Atbasarǵa sý tasqynymen kúresýge kelgen qutqarýshylar úılerine qaıtty
Aqmola oblysy ákimdiginiń málimetinshe, óńirde sý tasqyny qaýpi ótti. Birlesken jumystyń nátıjesinde 25 eldi mekende eki myń turǵyn úıdi sý basýyna jol berilmedi, sý tasqynynan zardap shekkenderge keltirilgen zalal barynsha azaıtyldy.
Sý tasqynyna qarsy is-sharalarǵa azamattyq qorǵanys júıesi, Ulttyq ulan, Іshki ister organdarynyń 3 myńnan astam qyzmetkeri jáne 1,5 myńǵa jýyq arnaıy tehnıka jumyldyryldy. Oblystaǵy eldi mekenderdi sýdan qorǵaý úshin uzyndyǵy 45 km jasandy bóget, ınertti materıal salynǵan 300 myńǵa jýyq qap daıyndaldy.
Sý tasqynyna qarsy kúrestiń aldyńǵy qatarynda Aqmola, Jambyl oblystary jáne Shymkent qalasy Tótenshe jaǵdaılar departamentteriniń qyzmetkerleri, Málik Ǵabdýllın atyndaǵy azamattyq qorǵaý akademııasynyń kýrsanttary men ofıtserleri, 5510 áskerı bóliminiń jeke quramy, polıtsııa qyzmetkerleri men eriktiler boldy.
Kóktemgi sý tasqyny ótken kúrdeli jáne aýqymdy ýchaskelerdiń biri - Atbasar aýdany. Qazirgi ýaqytta Jabaı ózenindegi sý deńgeıi 2,8 metrge deıin tómendedi.
Búgin Atbasar qalasynda sý tasqynyn joıýǵa qatysýshylardy saltanatty túrde shyǵaryp salý rásimi ótti.
Qutqarýshylarǵa Aqmola oblysynyń ákimi alǵysyn bildirip, birlesken kúsh-jigerdiń araqasynda sý tasqynynyń eń joǵary kezeńderin az shyǵynmen ótkizýge múmkindik bergenin atap ótti.
«Birlesken jáne jedel kúsh-jigerdiń arqasynda biz sý tasqynynyń aýyr zardaptaryn boldyrmaýǵa jáne eń bastysy - adamdardyń ómirin saqtap qalýǵa qol jetkizdik. Bul iste azamattyq qorǵaý jáne ishki ister, qorǵanys organdarynyń qyzmetkerleri úlken jumys atqardy. Sizder óz mindetterińizdi abyroımen oryndadyńyzdar - adamdardyń ómirin, qaýipsizdigin jáne quqyqtaryn qorǵadyńyzdar. Bizdiń azamattarymyzdyń tynyshtyǵy, olardyń óz ál-aýqatyna degen senimi birinshi kezekte sizdirdiń synı sátterdegi is-áreketterińizge baılanysty», - dedi Marat Ahmetjanov.
Sý tasqyny kezinde eriktiler, turǵyndardyń ózderi jáne kásipkerler de úlken kómek kórsetti.
«Qazir qalpyna keltirý jumystary bastaldy. Úıler, ınjenerlik ınfraqurylym salý boıynsha kóp jumystar atqarýymyz kerek. Bul baǵytta biz kezeń-kezeńmen jumys isteı bastadyq. Birinshi kezekte sý basqan aýyldarǵa kólik qatynasy ashyldy, barlyq ótinish bildirýshilerge birjolǵy tólemder bastaldy, materıaldyq shyǵyndar eseptelip jatyr. Sý tasqynynan zardap shekkenderdiń eshqaısysy da nazardan tys qalmaıdy», - dedi oblys ákimi.
Sonymen birge, qala turǵyny Ekaterına Matros ta sóz sóılep, atbasarlyqtar atynan barlyq qutqarýshylarǵa alǵysyn bildirdi. Atbasar aýdanynda avarııalyq-qutqarý jumystaryna 400-ge jýyq adam qatysyp, 70-ten astam birlik arnaıy tehnıka jumyldyryldy.
Aıta ketsek, budan buryn evakýatsııalanǵan 2 myńnan astam aqmolalyq úılerine oralǵanyn jazǵan edik.