Atbasarda jazýshy Іlııas Esenberlınniń 104 jyldyǵy atalyp ótti

KÓKShETAÝ. QazAqparat - Atbasarda tanymal jazýshy Іlııas Esenberlındi eske alýǵa arnalǵan saltanatty mıtıng ótti, dep habarlaıdy QazAqparat tilshisi óńirlik kommýnıkatsııalar qyzmetine silteme jasap.

Aıta keteıik, bıyl 20-ǵasyrdaǵy qazaq ádebıetiniń klassıgi, QR memlekettik syılyǵynyń laýreaty, asa kórnekti jazýshy Іlııas Esenberlınniń týǵanyna 104 jyl toldy. І.Esenberlınniń qazaq ádebıetindegi «Kóshpendiler» jáne «Altyn Orda» tarıhı romandary - dúnıe júzine tanymal irgeli shyǵarmalar.

«Іlııas Esenberlınniń aıtqan dana sózderiniń barlyǵy aqıqatpen úndesedi. Ol qazaq rýhanı qoǵamynyń, ásirese memleketshildik túısiktiń qalyptasýyna aıryqsha úles qosqan adam. Shyǵarmashylyǵy arqyly tyń taqyryptardy qozǵap, qazaq ádebıetine jańa lep ákeldi jáne halqyna rýhanı dem berdi. Sondyqtan, búgingi urpaqqa onyń eńbekterin jetkizý mańyzdy», - deıdi vedomstvodan.

Atbasar qalasynyń ortalyǵynda ornalasqan Esenberlınniń eskertkishi mańynda ótken mıtıngke aýdan aqsaqaldary, zııaly qaýym, memlekettik qyzmetkerler, mádenıet salasynyń mamandary jáne mektep oqýshylary men kolledj stýdentteri qatysty.

Sharada aýdandyq «Qazaq tili jáne mádenıeti» qoǵamdyq birlestiginiń tóraǵasy Saılaý Basmanov, І.Esenberlın ádebıet murajaıynyń meńgerýshisi Ulbolsyn Qambatyrova jazýshy týraly jyly lebizderin jetkizse, jergilikti aqyn Sárinjip Daıyrov, Atbasardaǵy №8 orta mekteptiń 6-synyp oqýshysy Albına Azatova óleń shýmaǵyn oqyp berdi.

Jınalǵandar Іlııas Esenberlın eskertkishine gúl shoqtaryn qoıyp, murajaıyn aralady.