Atbasarda ózen jaǵasynan áıeldiń bólshektelgen denesi tabyldy

KÓKShETAÝ. QazAqparat – Aqmola oblysynyń Atbasar aýdanynda áıeldi óltirip, denesin bólshektep ózenge tastaǵan kúdikti ustaldy, dep habarlaıdy QazAqparat tilshisi.

Aqmola oblystyq Polıtsııa departamenti baspasóz qyzmetiniń málimetinshe, maýsymnyń 21-inde Atbasar aýdanynyń aýmaǵynda «Jabaı» ózeniniń bógetinen adam denesiniń bólikteri tabyldy.

«Osyǵan baılanysty polıtsııa Qylmystyq kodeksiniń 99-baby 1-bóligi boıynsha («Kisi óltirý») boıynsha sotqa deıingi tergeýdi bastady. Jedel izdestirý júrgizilip, bir táýlik ishinde áıeldiń jeke basy anyqtaldy, sonymen birge kúdikti ustalyp, ýaqytsha ustaý ızolıatoryna qamaldy. Qazaqstan Respýblıkasy Qylmystyq is júrgizý kodeksiniń 201-babyna sáıkes sotqa deıingi tergep-tekserý derekteri tergeý múddesine saı jarııa etilmeıdi», - dedi vedomstvodan.

Aıta ketsek, bul týraly áleýmettik jelide beınejazba jarııalandy. Onda ózen jaǵasyndaǵy qamystyń arasynan bólshektelgen áıeldiń denesi tabylǵany aıtylǵan. Ony jergilikti turǵyndar kórip, habarlaǵan.

Eske sala ketsek, budan buryn Kókshetaýda iz-túzsiz joǵalǵan 65 jastaǵy áıel bir aıdan beri tabylmaı jatqandyǵyn jazǵan bolatynbyz.