Atbasarda ańshy jigit balyq aýlap otyrǵan adamǵa oq atqan

KÓKShETAÝ. QazAqparat - Atbasar aýdandyq kópbeıindi aýrýhanasynyń dárigerleri ań aýlaý kezinde abaısyzda oq tıgen er adamnyń ómirin saqtap qaldy, dep habarlaıdy QazAqparat tilshisi.

Aqmola oblystyq Densaýlyq saqtaý basqarmasy baspasóz qyzmetiniń málimetinshe, qyrkúıektiń 2-sinde Atbasar aýdandyq kópbeıindi aýrýhanasyna moıyn, keýdeniń on jaq tusyna oq tıgen 39 jastaǵy er adam tústi. Naýqastyń sózinshe, Esil ózeniniń mańynda balyq aýlap júrgen oǵan belgisiz bireý oq atqan.

«Dárigerlik tekseris kezinde er adamnyń moıyn tusynan, oń jaqtaǵy sýpraklavıkýlıarlyq aımaqqa oq tıgeni anyqtaldy. Naýqasqa dáriger hırýrg Vıktor Kozeev ota jasady», - dedi vedomstvodan.

Atbasar aýdandyq kópbeıińdi aýrýhanasynyń bas dárigeri Zaryqqan Shaýbaevtyń aıtýynsha, búgingi tańda naýqastyń jaǵdaıy turaqty. Er adam travmatologııa bólimine jatyzyldy.

Aqmola oblystyq Polıtsııa departamenti baspasóz qyzmetiniń málimetinshe, zardap shegýshini Atbasar qalasynyń 1990 jylǵy turǵyny ań aýlap júrgende abaısyzda atyp jibergen. Bul derek Qylmystyq kodekstiń 114-babynyń 3-bóligi «abaısyzda densaýlyqqa aýyr zııan keltirý» boıynsha sotqa deıingi tergeýdiń biryńǵaı tizilimine engizildi.

Budan bólek, Ákimshilik quqyqbuzýshylyq kodeksiniń 482-baby «Jeke jáne zańdy tulǵalardyń qarýdy zańsyz satyp alýy, berýi, ótkizýi, saqtaýy, alyp júrýi, tasymaldaýy» boıynsha ákimshilik hattama toltyryldy.

Aıta ketsek, budan buryn betine úshkir temir qadalǵan 10 jasar balany qutqarǵan aqmolalyq dárigerler marapattalǵan edi.