Atbasar túrmesinde qyzmetten bosaǵan 11 adam kásibı mindetterin tolyq bilmegen – Janat Eshmaǵambetov

ASTANA. QazAqparat – Qylmystyq-atqarý júıesi komıtetiniń tóraǵasy Janat Eshmaǵambetov Atbasar túrmesindegi azaptaý faktisimen jumystan shyǵarylǵan qyzmetkerler kásibı mindetteri men quqyqtaryn tolyq bilmegen dep esepteıdi, dep habarlaıdy QazAqparat tilshisi.

«Men olardyń áreketteri zańsyz ekenine senimdimin. Beıneúndeýge qaraǵanda, ózińiz de kórgen shyǵarsyz, olar ózderin jumystan bosatyp, qylmystyq jaýapkershilikke tartýyn ádiletsiz sheshim shyǵarylǵan dep esepteıdi.

Atalǵan oqıǵadaǵy 11 qyzmetker týraly aıtsaq, ıá, olar arnaıy quraldardy naqty qaı kezde qoldaný kerektigin bilmegen. Osyǵan baılanysty qylmystyq-atqarý departamentiniń basshysy deńgeıinde qatań shara qoldanylyp otyr», - dedi komıtet basshysy.

Janat Eshmaǵambetov biliksiz qyzmetkerlerdiń júıede jumys isteýi mekeme men oblystyq deńgeıdegi basshylardyń kemshiligi ekenin aıtady.

«Bul mekemede jeke quramdy, ásirese, sottalýshylarǵa qatigezdik tanytýdyń aldyn alý baǵytynda júrgizilgen kásibı daıarlaý jumystarynyń bári óz deńgeıinde bolmaǵan. Bul osy mekemeniń basshysy men oblystyq departament basshysynyń kemshiligi.

Biz ózge mekemelerdiń, oblystyq departamentter ókilderiniń pikirin udaıy tyńdap otyramyz. Bizdiń qyzmetkerlerdiń bári, búkil jerdegi ujymdar azaptaý týraly beınejazbadaǵy jaǵdaıǵa qatty narazy», - dedi ol.

Eske salsaq, Aqmola oblysynyń Atbasar túrmesindegi sottalǵandarǵa qatysty kúsh qoldaný deregi boıynsha prokýratýra sotqa deıingi tergeýdi bastaǵanyn jazǵan edik.

Keıin osy oqıǵaǵa baılanysty Amola oblystyq qylmystyq-atqarý júıesi departamentiniń bastyǵy qyzmetinen shettetildi.