Atbasar aýdanynyń prokýratýrasy kásipkerlerdi qoqys úshin alynyp kelgen tólemderden bosatty

ASTANA. QazAqparat - Atbasar aýdanynyń prokýratýrasy kásipkerlerdi turmystyq qatty qaldyqtardy jınaý, tasymaldaý, suryptaý jáne kómý úshin zańsyz tólemderden bosatty, dep hbarlaıdy QazAqparat QR Bas prokýratýrasynyń baspasóz qyzmetine silteme jasap.

Sonymen 2022 jylǵy 2 qyrkúıekten bastap Atbasar aýdanynda halyq úshin qatty turmystyq qaldyqtardy jınaýǵa, tasymaldaýǵa, suryptaýǵa jáne kómýge bekitilgen tarıf kúshine endi.

Sol kúni aýdandyq «Prostor-Atbasar» gazetinde qyzmet kórsetýshi «MJD Atbasar servıs kommýnalnye ýslýgı» JShS-nyń qatty turmystyq qaldyqtardy shyǵarýǵa arnalǵan jarııa sharty jarııalandy.

Aýdan prokýratýrasynyń anyqtaýynsha, joǵaryda aıtylǵan seriktestik kásipkerlerdi qatty turmystyq qaldyqtardy jınaý jáne shyǵarý boıynsha qyzmet aqysyn tóleýge zańsyz mindettegen.

Sonymen qatar, Ekologııalyq kodekstiń 367-babyna sáıkes, qyzmet kórsetýshi jeke kásipkerlermen jáne qyzmetin turǵyn úılerde nemese jeke ǵımarattarda júzege asyratyn zańdy tulǵalarmen jeke sharttar jasasýǵa mindetti.

Nátıjesinde Seriktestik jarııa sharttyń talaptaryna silteme jasaı otyryp, kásipkerlermen jeke kelisim-shart jasamaı olardan negizsiz somalardy óndirip alǵan.

Prokýratýranyń qadaǵalaý aktisi boıynsha Atbasar aýdanynyń ákimdigi Pavlodar oblysynyń mamandandyrylǵan aýdanaralyq ekonomıkalyq sotyna (eksaýmaqtyq sottylyq boıynsha) kásipkerlerdiń quqyqtaryn qozǵaıtyn jarııa sharttyń jekelegen tarmaqtaryn jaramsyz dep taný týraly talap aryz berdi, talap aryz tolyqtaı qanaǵattandyryldy.

Apellıatsııalyq satyda joǵaryda atalǵan sot sheshimi ózgerissiz qaldyryldy.

Osylaısha, prokýrorlar 1777 kásipkerdiń (1246 jeke kásipker jáne 531 zańdy tulǵa) quqyqtaryn qorǵady, olar jarııa Sharttyń mindettemelerinen bosatylyp, ózderi úshin tıimdi sharttar boıynsha jeke sharttar jasaı alady.