Ataýly áleýmettik kómekti berý talaptary ózgermek

ASTANA. QazAqparat – Eńbek jáne halyqty áleýmettik qorǵaý mınıstrligi ataýly áleýmettik kómekti taǵaıyndaý jáne tóleý qaǵıdalaryna ózgerister men tolyqtyrýlar engizbekshi, dep habarlaıdy QazAqparat tilshisi.

Kózdelip otyrǵan ózgerister «Memlekettik ataýly áleýmettik kómek týraly» zańǵa qabyldanǵan túzetýlerge baılanysty engizilmekshi.

Atap aıtqanda, mynadaı jańashyldyqtar usynylyp otyr:

- kepildi áleýmettik paketti usyný, onyń qunyn óteý tártibin, sondaı-aq áleýmettik qyzmetter portalynyń jumys isteý máselelerin retteıtin erejelerdi alyp tastaý;

- AÁK kórsetýge ótinish berý tártibin proaktıvti formatta uıymdastyrý;

- «Azamattarǵa arnalǵan úkimet» memlekettik korporatsııasynyń AÁK ýaqtyly tóleýdi qamtamasyz etýi jáne AÁK tólemderiniń aı saıynǵy qajettiligin, tólemder kestesin qalyptastyrý, tıisti ýákiletti memlekettik organǵa AÁK tóleýge qarajattyń qajettiligi týraly ótinimdi jiberý jónindegi quzyretin aıqyndaý;

- AÁK taǵaıyndaý kezeńine 1 jastan 6 jasqa deıingi árbir balaǵa 1,5 AEK mólsherinde qosymsha tólem belgileý.

Bul rette proaktıvti qyzmet ony alýshynyń ótinishinsiz-aq, ıaǵnı, jaýapty vedomstvonyń bastamasy boıynsha kórsetiletini aıtylǵan.

AÁK alýshy ýchaskelik komıssııaǵa óziniń materıaldyq jaǵdaıyn tekserýge kelisimb erýi ataýly áleýmettik kómekti proaktıvti formatta taǵaıyndaýǵy negiz bolmaq.

Osylaısha, ýchaskelik komıssııaǵa materıaldyq jaǵdaıyna tekserý júrgizýge kelisim berilgen kún AÁK taǵaıyndaýǵa ótinish bergen kún bolyp esepteledi.

Sondaı-aq qujatta AÁK-ti belsendi formatta taǵaıyndaý úshin mobıldi azamattar bazasynda tirkelgen uıaly baılanystyń abonenttik nómirin tirkeý qajet ekendigi aıtylǵan.

Bir jastan alty jasqa deıingi árbir balaǵa AÁK jáne aı saıynǵy qosymsha tólemdi tóleýdi ýákiletti organ memlekettik korporatsııa arqyly ataýly áleýmettik kómek tóleý jónindegi ýákiletti uıymdaǵy bank shottaryna nemese elektrondyq ámııandarǵa elektrondyq aqshamen aýdarý arqyly júrgizedi.

Bul rette bir jastan alty jasqa deıingi balalarǵa aı saıynǵy qosymsha tólem balalardyń jasyn eskere otyryp, aǵymdaǵy toqsanǵa AÁK alýshylarǵa taǵaıyndalady jáne aı saıyn tólenedi.

AÁK taǵaıyndaý týraly ótinishte bir jastan 6 jasqa deıingi barlyq balalardy, onyń ishinde aǵymdaǵy toqsanda bir jasqa tolǵan balalardy kórsetý qajet.

Ataýly áleýmettik kómek taǵaıyndaý týraly sheshimde balanyń jasyn eskere otyryp, balalarǵa aı saıynǵy qosymsha tólem tóleý kezeńi kórsetiledi. Bala qaıtys bolǵan jaǵdaıda aı saıynǵy qosymsha tólem bala qaıtys bolǵan aıǵa tólenedi.

Járdemaqy berý jónindegi qyzmetterge aqy tóleý Memlekettik korporatsııa men memlekettik ataýly áleýmettik kómek tóleý jónindegi ýákiletti uıym arasynda jasalatyn shart negizinde júrgiziledi dep kózdeledi.

Buıryq jobasy Ashyq NQA portalynda 25 qarashaǵa deıin qoǵam talqylaýyna usynylyp otyr.

Ashyq kózderden alynǵan foto