Ataýly áleýmettik kómekti 800 myń qazaqstandyq alady - Qarjy mınıstrligi
«Azamattardyń jekelegen sanattaryn áleýmettik turǵyda qoldaý maqsatynda 2019 jyly AÁK taǵaıyndaý mehanızmi ózgeredi. Osylaısha, AÁK kórsetý talaby boıynsha kúnkóris mınımýmy 50-den 70 paıyzǵa, ıaǵnı 14 849 teńgeden 20 789 teńgege ulǵaıady. Nátıjesinde, AÁK-pen qamtý aýqymy 800 myń adamǵa jetedi», - dedi Tatıana Saveleva Qazaqstannyń 2019-2023 jyldarǵa arnalǵan áleýmettik-ekonomıkalyq damý boljamyn naqtylaýǵa arnalǵan otyrysy barysynda.
Onyń aıtýynsha, AÁK taǵaıyndaý barysynda otbasynyń jalpy kirisinen kópbalaly analarǵa jáne otbasylarǵa, «Kúmis alqa» jáne «Altyn alqaǵa» beriletin járdemaqy, sonymen birge balalarǵa múgedektigi boıynsha beriletin járdemaqy men shákirtaqy alynyp tastalady. Sonymen qatar, AÁK-ti taǵaıyndaý mehanızmi boıynsha az qamtylǵan otbasylardyń ár balasyna aı saıyn kúnkóris mınımýmynyń 70 paıyzy nemese 20 789 teńgeden beriledi.
«Jalpy, AÁK-ti aýdarý rásimin jeńildetýge, shynaıy kómekke muqtaj azamattardy qamtýǵa baǵyttalǵan barlyq sharalar qarastyrylatyn bolady. Eńbek jáne halyqty áleýmettik qorǵaý mınıstrligi osy baǵytta otbasylardyń kirisi qalaı ózgeretini týraly naqty mysaldar bar», - deıdi vıtse-mınıstr Tatıana Saveleva.
Vıtse-mınıstr naqtylanǵan bıýdjet boıynsha múgedek balany tárbıelep jatqan ata-anaǵa nemese asyrap alýshyǵa (bala kezinen birinshi toptaǵy múgedek balany tárbıelep jatqandarǵa) beriletin járdemaqy 31 183 teńgeden 41 577 teńgege ósetinin habarlady.