Ataýly áleýmettik kómek jańa ómir bastaýǵa kómektesti – Pavlodar turǵyny

PAVLODAR. QazAqparat - Túrkistan oblysy Arys qalasynan Pavlodar oblysynyń Maıqońyr aýylyna qonys aýdarǵan Serik Jádigerdiń kópbalaly otbasy memleket tarapynan kórsetilip jatqan qoldaýǵa dán rıza. Qonys aýdarýshylar ataýly áleýmettik kómekti jáne basqa da tólemderdi alyp, alańsyz jańa ómir bstady, dep habarlaıdy QazAqparat Eńbek jáne halyqty áleýmetitk qorǵaý mınıstrligine silteme jasap.

Kópbalaly úıdiń otaǵasy Serik Jádiger 2017 jyly eldiń soltústik óńirine kóshý týraly sheshim qabyldaǵan. Qonys aýdarýǵa birden bir sebep - osy áýlettiń qyzy, bala kezinen múgedektigi bar, 5 ret kúrdeli ota jasatqan 5-synyp oqýshysy Ásemaı Kárim boldy. Qyz balanyń densaýlyǵy shuǵyl túrde klımat jaǵdaıynyń aýysýyn qajet etti.

«Bizdiń alty balamyz bar. Bıylǵy sáýir aıynda bizge 1 mln 567 myń 200 teńge somasynda ataýly áleýmettik kómek taǵaıyndaldy, aı saıyn 130 myń 600 teńge alamyz. Sondaı-aq, bizge jeke qosalqy sharýashylyqty damytýǵa 176 myń 750 teńge kóleminde kómek kórsetildi. Bul aqshaǵa biz sıyr satyp aldyq. Endi biz dúkennen sút ónimderin satyp almaımyz – bári tabıǵı. Taǵy bizge «Otaý TV» televızııalyq qosymshasyn ornatyp berdi. Árıne, týǵan ólkemizdi saǵynamyz, biraq bul jaq ta bizge óte unaıdy», – deıdi Seriktiń jubaıy Marjan Nálibaeva.

Ertis aýdandyq máslıhatynyń sheshimi boıynsha bul kóp balaly otbasynyń 4 balasyn mektepke daıyndaýǵa 50 myń 500 teńge kóleminde birjolǵy áleýmettik tólem kórsetildi.

«Serik Jádiger turaqty jumyspen qamtamasyz etildi. Endi ol Maıqońyr aýyly ákiminiń apparatynda júrgizýshi bolyp jumys isteıdi. Onyń jubaıy Marjan Nálibaeva Maıqońyr aýyldyq klýbyna tehnıkalyq qyzmetker bolyp jumysqa ornalasty», – dep habarlady Pavlodar oblysynyń jumyspen qamtýdy úılestirý jáne áleýmettik baǵdarlamalar basqarmasynyń orynbasary Gúlnar Kamalova.

Sonymen qatar, Nátıjeli jumyspen qamtý jáne jappaı kásipkerlikti damytýdyń «Eńbek» memlekettik baǵdarlamasynyń ekinshi baǵyty aıasynda Serik Jádigerge usaq mal ósirý úshin 1 mln 500 myń teńge somasynda mıkrokredıt alýǵa kómek kórsetildi. Bul qarajatqa ol óziniń jeke qosalqy sharýashylyǵy úshin 50 bas qoı satyp aldy.

«Otbasymyzǵa jańa orynda naqty kómek kórsetildi, balalardyń mektepke kerek-jaraǵyn alýǵa da kómektesti, jumysqa da ornalastyrdy. Al AÁK-tiń kómegimen otbasymnyń ál-aýqaty aıtarlyqtaı jaqsardy. Endi biz jaqsy ómir súrip jatyrmyz dep aıta alamyn», - deıdi Serik Jádiger.

Pavlodar oblysynyń jumyspen qamtýdy úılestirý jáne áleýmettik baǵdarlamalar basqarmasynyń orynbasary Gúlnar Kamalovanyń aqparatynsha, qazirgi ýaqytta 59 otbasy jalpy somasy 19 mln 200 myń teńge somasynda áleýmettik kómek alady. Onyń ishinde 42 otbasyǵa 100 AEK kóleminde 10 mıllıon 600 myń teńge, 17 otbasyǵa árqaısysyna - 200 AEK-ten, jalpy somasy 8 mıllıon 600 myń teńge tólenedi.

Esterińizge sala keteıik, 15 tamyzdaǵy jaǵdaı boıynsha ataýly áleýmettik kómekpen 1,8 mln qazaqstandyq qamtylǵan. Járdemaqy alýshylardyń eń kóbi Túrkistan oblysynda – 498,7 myń adam. Sondaı-aq, Almaty oblysynda – 225,4 myń adam, Shymkent qalasynda – 216,3 myń adam atalmysh járdemaqyny alyp otyr. 1 tamyzdaǵy jaǵdaı boıynsha 103 mlrd teńge kóleminde AÁK tólendi. Bir otbasyna tólemniń ortasha mólsheri aıyna 86 myń teńgeni qurap otyr.