Ataýly áleýmettik kómek kimderge taǵaıyndalady

ASTANA. QazAqparat - 2022 jylǵy 1 qarashadaǵy jaǵdaı boıynsha 135,8 myń otbasyndaǵy 699,1 myń adamǵa ataýly áleýmettik kómek taǵaıyndaldy. Bıyl osy maqsatta bıýdjetten 64,5 mlrd teńge bólindi, dep habarlaıdy QazAqparat Eńbek mınıstrligine silteme jasap.

AÁK otbasynyń árbir múshesine jan basyna shaqqandaǵy ortasha tabysy óńirlik eń tómengi kúnkóris deńgeıiniń 70%-ynan tómen azamattarǵa taǵaıyndalady.

Budan basqa, AÁK kórsetýdiń jańa tetigin iske asyrý sheńberinde elimizdiń barlyq óńirinde tabysy az otbasylardyń mektep jasyna deıingi balalaryn kepildik berilgen áleýmettik toptamamen (budan ári – áleýmettik toptama) qamtamasyz etý boıynsha jumys júrgizilýde.

2022 jylǵy 1 qarashada AÁK alýshylar qataryndaǵy
1 jastan 6 jasqa deıingi 191,4 myń balaǵa azyq-túlik jáne turmystyq hımııa jıyntyǵy túrinde áleýmettik toptama taǵaıyndaldy.

Aıta keteıik, bıyl qańtar aıyndaǵy TJ rejımine baılanysty 2021 jyldyń 4 toqsanynda AÁK alǵan azamattarǵa tólemder 2022 jyldyń 1 toqsanyna avtomatty túrde uzartyldy. Bul rette jańa alýshylarǵa Elektrondyq úkimet portaly arqyly ataýly áleýmettik kómek taǵaıyndaýǵa ótinish berý múmkindigi berildi.

Qazirgi ýaqytta qazaqstandyqtar AÁK taǵaıyndaýǵa ótinishti turǵylyqty jeri boıynsha jumyspen qamtý ortalyǵynda, sondaı-aq egov.kz elektrondyq úkimet portaly arqyly bere alady.