Ataýly áleýmettik kómekten ajyratylǵandardyń 30 paıyzy eńbekke jaramdy – mınıstrlik

<p>ASTANA. KAZINFORM &ndash; Eńbek jáne halyqty áleýmettik qorǵaý mınıstrligi Kazinform saýalyna joldaǵan jaýabynda ataýly áleýmettik kómek alýshylardyń sany nege kúrt qysqarǵanyn túsindirdi</p>

«2023 jyly ataýly áleýmettik kómekti tóleýge 57,4 mlrd teńge jumsaldy. 2019 jyly AÁK usyný tájirıbesi kórsetkendeı, bizdiń keıbir azamattarymyz áleýmettik kómekti zańsyz jolmen alýǵa umtyldy. Mysaly, naqty jalaqyny jasyrý, jalǵan ajyrasýlar jasaý arqyly. Basqa elderdiń tájirıbesi bul úrdis tek bizdiń elimizge ǵana tán emes ekenin kórsetti», - dep jazylǵan mınıstrlik jaýabynda.

Vedomstvonyń aqparatynda 2023 jylǵy 1 shildeden bastap kúshine engen Áleýmettik Kodeks sheńberinde muqtaj azamattardyń sanattary qaıta qaralǵany aıtylǵan.

«Ataýly áleýmettik kómek alýshylardy nátıjeli jumyspen qamtýǵa tartý arqyly olardyń sanyn azaıtýǵa múmkindik berdi. Nátıjesinde alýshylar sany 2019 jyly 2,2 mln adamnan 2023 jyly 598 myń adamǵa deıin tómendedi. Olardyń 30%-y eńbekke qabiletti jastaǵy azamattar. Azamattardyń shyǵystaryn eskere otyryp, AÁK kórsetý júıesin qaıta qurý josparlanýda. Máselen, múddeli memlekettik organdarmen birlesip negizgi shyǵystardy esepke alý jáne verıfıkatsııalaý tetigi pysyqtalýda. Bul bıýdjet qarajatynyń ataýlylyǵy men maqsatty paıdalanylýyn qamtamasyz etý úshin áleýetti kómek alýshylardy ǵana emes, bıýdjettiń shyǵys bóligin de aıqyndaýǵa múmkindik beredi. AÁK transformatsııasynyń barlyq protsesterinde negizgi komponent adam faktoryn alyp tastaý retinde, tsıfrlandyrý bolady», - delingen jaýapta.