«Ataý kere»: Kanadada er adam óler aldynda «Dıýna 2» fılmin kórgisi kelgen

<p>ASTANA. KAZINFORM — Kanadanyń Kvebek qalasyndaǵy hospıstiń negizin qalaýshy Joze Ganon Facebook paraqshasynda emdelýshileriniń biri jan tapsyrar aldynda «Dıýna 2» fılmin kórgisi kelgeninin jazdy. Fılmniń rejısseri Denı Vılnev premeraǵa 1,5 aı qalǵanda kómekshisi arqyly oǵan fılmniń kóshirmesi men kompıýter berip jibergen, dep jazady <a href="https://www.washingtonpost.com/lifestyle/2024/03/04/dune-2-dying-wish-villeneuve-quebec/" target="_blank" rel="noopener">The Washington Post</a>.</p>

Joze Ganon 2024 jyldyń qańtar aıynyń basynda Facebook-te «bireýdiń ómiriniń sońynda azǵantaı fokýs jasaý úshin» rejısser Denı Vılnevpen baılanysqysy keletinin jarııalaǵan.

Postta Vılnevtiń ne úshin qajet ekeni, naýqastyń kim ekeni aıtylmaǵan. Bir jarym aıdan keıin, «Dıýna 2» shyǵarylǵan kúni Joze Ganon oqıǵanyń egjeı-tegjeıin túsindirdi.

Onyń aıtýynsha, hospıs patsıenti qaıtys bolmas buryn «Dıýna 2» fılmin kórgisi keletinin aıtqan. Hospıstiń negizin qalaýshy naýqas týraly eshteńe aıtpady, tek naýqastyń ózimen túıdeı qurdas ekenin aıtqan (The Washington Post naýqastyń jasy 50-den asqanyn naqtylady). Naýqas óziniń hobbıi týraly baıandaǵan kezde fılmderdi jaqsy kóretinin aıtqan.

Ol fılmniń rejısseri Denı Vılnevpen tez arada baılanysqa shyqqan. Joze Ganon bastapqyda rejısserdiń óz fılmderiniń jankúıerlerine alǵys beınerolıgin jiberýin ǵana qalady. Alaıda Vılnev pen onyń áıeline (ol kınoprodıýser bolǵan) bul oqıǵa «qatty áser etken».

«Fılmder osyndaı adamǵa arnalǵan», — deıdi Denıs Vılnev pen onyń jubaıy.

Sodan keıin olar fılmdi kórý úshin hospıs patsıentin Monrealǵa ákelýdiń joldaryn izdeı bastaǵan, biraq patsıent saparǵa tym álsiz bolǵan jáne ýaqyty da az edi.

16 qańtarda Vılnevtiń kómekshisi ózimen birge fılmniń kóshirmesi bar rejısserdiń kompıýterin alyp, Kvebekke ushyp barǵan. Naýqasqa arnalǵan fılmniń kórsetilimi perdelermen jabylǵan bólmede ótken. Demonstratsııaǵa qatysqandar aqparatty jarııa etpeý týraly qujattarǵa qol qoıyp, beınejazbalar jarııalanbaýy úshin telefondaryn ýaqytsha tapsyrǵan.

Naýqas aýyrsynýyna baılanysty úsh saǵattyq fılmdi tolyq kóre almaǵan, kórsetilim fılmniń jartysyna jýyqtaǵanda toqtaǵan. Naýqas birneshe kúnnen keıin qaıtys boldy.

«Dıýna 2» búkil álem boıynsha 2024 jyldyń 1 naýryzynda, osy oqıǵadan bir jarym aıdan keıin kórsetile bastady.