Ataý berilgen Astananyń ár kóshesine aqparattyq stend ilý usynyldy

ASTANA. QazAqparat – Qandaı da bir tulǵanyń esimi kóshege berilse, onda sol kósheniń boıynda onyń elimizge sińirgen úlken eńbegi men erligi týraly aqparat ornalastyrylǵan stendter bolýy tıis. Astana qalasynyń kóshelerine ataý berý boıynsha elorda máslıhatynda ótken qoǵamdyq tyńdaýda máslıhat hatshysy Erlan Kanalımov osylaı aıtty, dep habarlaıdy QazAqparat tilshisi.

«Biz ortalyq kóshelerge úlken azamattardyń, tulǵalardyń esimin bergenge tolyq kelisemiz. Biraq turǵyn úı massıvterine berilgen ataýlardy kóp halyq túsinbeıdi. «Myna kóshe ne maǵyna bildiredi?» dep jatady. Sondyqtan ár kósheniń bas jaǵy nemese orta jaǵyna stend sııaqty aqparat ilip qoıyńyzdar... Kóp shyǵyn ketpeıdi ǵoı. Kóshege berilgen tulǵanyń aty halyqtyń jadynda máńgi qalýy kerek dep oılaımyn. Osyǵan baılanysty onyń jasaǵan úlken erligi, salasy boıynsha atqarǵan eń úzdik eńbegi jazylyp turýy tıis. Kóshege ataý bere salyp, mindetten qutyldyq degen bolmaıdy», - dep usynys bildirdi Erlan Kanalımov.

Sondaı-aq onomastıka komıssııasynyń qorytyndysyna sáıkes, elordadaǵy 12 kóshege qazaqtyń tarıhı tulǵalarynyń esimin berý usynyldy. Qoǵamdyq tyńdaýda sonyń on biri qoldaý tapty, bir kósheniń ataýy boıynsha máseleni qaıta qaraý tapsyryldy.