Atatúriktiń «Joldaý» kitaby qazaqshaǵa aýdaryldy

NUR-SULTAN, QazAqparat - Halyqaralyq Túrki akademııasy Túrkııadaǵy Mustafa Kemal Atatúrik bastaǵan ult-azattyq kúrestiń 100 jyldyǵyna arnap aýqymdy shara ótkizdi, dep habarlaıdy QazAqparat tilshisi.

«Tarıhtan taǵylym: Túrik ult-azattyq kúresi jáne Atatúrik» atty konferentsııadan bastalǵan sharalar kesheni arnaıy kórmege ulasyp, Atatúriktiń «Joldaý» atty kitabynyń qazaqsha nusqasynyń tusaýkeseri ótti.

Sharaǵa Qazaqstan Respýblıkasyndaǵy Ázerbaıjan, Qyrǵyzstan, Ózbekstan, Túrkııa, Majarstan jáne Túrikmenstannyń elshileri, QR Parlamenti Senaty men Májilisiniń depýtattary, kórnekti qoǵam qaıratkerleri, belgili ǵalymdar jáne etnomádenı ortalyqtardyń jetekshileri qatysty.

Halyqaralyq Túrki akademııasy shyǵarǵan «Joldaý» kitaby búginde túrki álemine ortaq jádiger sanalady. Túrkııa memleketin qurýshy tulǵa Mustafa Kemal Atatúrik atalmysh eńbegin óz qolymen jazyp júıelep, 1927 jyly Ankarada Ulttyq májiliste óz aýzymen 36,5 saǵat boıy oqyǵan degen derek bar. Oqyrman qaýym sol eńbekpen qazaq tilinde tanysýǵa múmkindik alyp otyr.

Konferentsııa barysynda sóz alǵan Halyqaralyq Túrki Akademııasynyń prezıdenti Darhan Qydyráli atalmysh datanyń túrki álemindegi orny erekshe ekenin atady.

«Osydan týra 100 jyl buryn Túrki dúnıesiniń erjúrek uly Mustafa Kemal Atatúrik Túrkııany azat etýge atqa qondy. Bıyl biz bul jyldy Atatúrik jyly dep jarııalaǵanbyz. Osy jyldyń aıasynda biz kóptegen sharalar uıymdastyryp jatyrmyz. Solardyń biri Atatúriktiń «Joldaý» atty kitabyn jaryqqa shyǵaryp otyrmyz» - dedi ol.

Túrkııanyń Qazaqstandaǵy Tótenshe jáne ókiletti elshisi Nevzat Ýıanyk aıtýly tarıhı oqıǵanyń mán-mańyzyna toqtaldy.

Al, memleket jáne qoǵam qaıratkeri, Túrki Keńesi Aqsaqaldar keńesiniń múshesi Ádil Ahmet baıandama jasady.

«Mustafa Kemal Atatúriktiń «Joldaý» degen shyǵarmasy Osmanly memleketiniń ydyraýy, Atatúriktiń basshylyǵymen júrgizilgen túrik halqynyń ult-azattyq kúresi jáne Túrkııa Respýblıkasynyń jarııalanyp, qalyptasýyna qatysty málimetterge asa baı eńbek. Ol sondaı-aq Atatúriktiń táýelsizdik jolyndaǵy kúres fılosofııasynan da mol maǵlumat beredi. «Joldaý» alǵash Túrkııada 1927 jyly bireýi negizgi mátin, ekinshisi qujattar retinde arab áripterimen eki kitap bolyp basyp shyǵarylǵan bolatyn» - dedi Ádil Ahmet.

Kitaphana foıesine qoıylǵan kórmede Túrkııa Respýblıkasynyń qalyptasý tarıhyn baıandaıtyn 40-tan astam foto qoıyldy.