ATANIıAZOV MYRZAǴUL

Atanııazov Myrzaǵul (1899-1945) - memleket jáne qoǵam qaıratkeri. 1917 jylǵy qazaq oqýshy jastarynyń «Jas tilek» mádenı-aǵartý uıymyn qurýshylardyń biri.

Burynǵy Torǵaı oblysy Aqtóbe ýeziniń №1 aýylynda (qazirgi Aqtóbe oblysy) týǵan. Orys-qazaq ýchılışesin, Aqtóbe muǵalimder semınarııasyn, KSRO Ádilet halyq komıssarıaty janyndaǵy Joǵary ádilet kýrsyn bitirgen.

1918-1920 jyldary - aýyl mektebiniń muǵalimi, alǵashqy Keńesterdi uıymdastyrýshy. 1920-1921 jyldary - Aqtóbe qalasyndaǵy ýezdik atqarý komıtetiniń hatshysy, tóraǵanyń orynbasary. 1921-1922 jyldary - Aqtóbe gýbernııalyq trıbýnaly áskerı alqasy tóraǵasynyń orynbasary, tóraǵasy. 1922 jyly - Qyrǵyz (Qazaq) oblystyq komıtetiniń bólim meńgerýshisiniń orynbasary, Qazaq AKSR Ádilet Halyq komıssary qyzmetterin atqarǵan. 1922-1924 jyldar aralyǵynda Máskeýde oqyǵan. 1925-1927 jyldary Reseı Keńestik Federatıvtik Sotsıalıstik Respýblıkasy Joǵarǵy Soty Qazaq bóliminiń tóraǵasy boldy. 1927-1928 jyldary - Aqmola gýbernııalyq atqarý komıtetiniń tóraǵasy. 1928-1929 jyldary - Semeı okrýgtik atqarý komıtetiniń tóraǵasy. 1929-1930 jyldary - Búkilodaqtyq Kommýnıstik (bolshevıkter) partııasy Qazaq ólkelik komıtetiniń nusqaýshysy. 1930-1931 jyldary - Qarqaraly okrýgtik komıtetiniń jáne Búkilodaqtyq Kommýnıstik (bolshevıkter) partııasy aýdandyq komıtetiniń hatshysy. 1931-1932 jyldary - Búkilodaqtyq Kommýnıstik (bolshevıkter) partııasy Qazaq ólkelik komıtetiniń nusqaýshysy. 1932-1933 jyldary - Almaty qalalyq baqylaý komıssııasy jumysshy-sharýa ınspektsııasynyń tóraǵasy. 1933-1934 jyldary - Qazaq AKSR-niń prokýrory. 1935-1937 jyldary - Búkilodaqtyq Kommýnıstik (bolshevıkter) partııasy Áýlıe-Ata aýdandyq komıtetiniń hatshysy. 1937-1938 jyldary Qazaqstan Kommýnıstik (bolshevıkter) partııasy Ortalyq komıtetiniń aýyl sharýashylyǵy bólimniń meńgerýshisi, «Aýlnyı Kazahstan» jýrnalynyń redaktory qyzmetterin atqarǵan.

Myrzaǵul Atanııazov RKFSR Joǵarǵy Soty Qazaq bóliminde azamattyq ister jónindegi sot alqasynyń qurylýyna aıtarlyqtaı úles qosyp, memlekettik qurylysty nyǵaıtý isteri men zań mekemeleri júıesin qalyptastyrýda aıryqsha eńbekter sińirgen. Asharshylyq jyldary Qazaqstannyń jer-jerindegi asyra silteýshilik pen zańsyzdyqtardyń betin ashqan.

1938 jyly qazaq zııalylary qýǵyn-súrginge ushyraǵan shaqta jalǵan aıyppen tutqyndalyp, GÝLAG-tyń Arhangelsk lagerine jiberilgen. 1943 jyly densaýlyǵyna baılanysty túrmeden bosap shyǵyp, eki jyldan keıin qaıtys bolǵan. 1957 jylǵy qazan aıynda aqtalǵan.

Derek kózi:

Qazaqstan ulttyq entsıklopedııasy 1 tom.