Atamyzdyń jerlengen jerin bilmeımiz – qýǵyn-súrgin qurbanynyń shóberesi

ÓSKEMEN. QazAqparat – 31 mamyr – Saıası qýǵyn-súrgin qurbandaryn eske alý kúni. 1937 jyly tek Shyǵys Qazaqstan oblysynyń ózinde 1350 adam qamaýǵa alynyp, 300 adam atý jazasyna kesilgen. Qýǵyn-súrginge ushyraǵandardyń biriniń urpaǵy – Svetlana Fýtkomaz, dep habarlaıdy QazAqparat tilshisi.

Ótken ǵasyrdyń ortasyna qaraı Qazaqstan jeri úlken bir túrmege aınalyp, Aljır, Steplag, Karlag sııaqty iri kolonııalar paıda boldy. Elimizde esimderi qaraly paraq betterinde jazylǵan jáne ómirleri asa qatygezdikpen qıylǵan jandardyń týǵan-týysqandary jyl saıyn 31 mamyrda tarıhqa úńilip, ata-apalaryn eske alady.

Svetlana Fýtkomaz qazir Shemonaıha aýdanynda turyp jatyr.

«Talaı jyldar boıy biz 1878 jyly týǵan úlken atamyz Vıkýla Borısov jaıly eshteńe bilmeı keldik. Ájem ákesin 1937 jyly NKVD qyzmetkerleri alyp ketip, keıin iz-túzsiz joǵalǵanyn aıtyp bergen. Úlken atamyz Shemonaıha aýdanynda Úbe ózeni arqyly ótetin paromda jumys istedi. Osy aýdanda turyp, qarapaıym sharýa bolǵan. Tek 2017 jyly ǵana biz atamyzdyń qaıtys bolǵany týraly tarıhı qujattardy muraǵattan izdep taptyq. Úlken atamyz NKVD-men tutqyndalyp, kináli dep tanylyp, bir aptadan keıin atylyp ketken eken. Sol qujattardy qolyma alyp, oqyp otyrǵan kezde kózimnen jas toqtamaı aqty», - dep áńgimelep berdi aýdandyq gazet tilshisi S.Fýtkomaz ShQO boıynsha Qylmystyq-atqarý júıesi departamenti OV 156/6 mekemesiniń qyzmetkerlerine.

Svetlana sol kezde qarapaıym sharýanyń joq bolyp ketip, eshqandaı sot úkiminsiz atylýy óte ókinishti ekenin aıtady.

«Sol zamanda sebepten-sebepsiz saıası qýǵyn-súrginge ushyraǵan adam sany kóp boldy. Tipti qazirge deıin atamyzdyń jerlengen jerin bilmeı otyrmyz. Bul - bizdiń tarıhymyz. Al tarıh máńgi esimizde qalady», - dedi saıası qýǵyn-súrginge ushyraǵan tulǵanyń shóberesi.