«Atamnyń amanaty» uıymy «Jyly júrek» syılyǵymen marapattaldy

NUR-SULTAN. QazAqparat - Búgin Nur-Sultan qalasynda «Atamnyń amanaty» qoǵamdyq birlestigin «Jyly júrek» búkilreseılik syılyǵymen marapattaý sharasy ótti, dep habarlaıdy QazAqparat tilshisi.

«Atamnyń amanaty» uıymy Ekinshi dúnıejúzilik soǵys kezinde qazaqstandyq sarbazdardyń jerlengen jerlerin anyqtap, muraǵattyq-izdestirý jumystarymen aınalysady. Bıyl Uıym «Rýhanı jańǵyrý» qazaqstandyq qoǵamdyq damý ınstıtýtynyń bastamasymen qolǵa alynǵan «Ózgerister sarýarlary» akseleratsııasynyń jeńimpazy retinde úzdik 20 jobanyń tizimine engen. «Rýhanı jańǵyrý» QQDI tóraǵasy Danııar Esınniń aıtýynsha, joba qazaqstandyqtardyń patrıotızmi men Otanǵa degen súıispenshilik sezimine baǵyttalǵan.

- «Atamnyń amanaty» uıymynyń ókilderi qoǵamdyq sanany jańǵyrtý boıynsha «Rýhanı jańǵyrý» baǵdarlamasynyń naǵyz elshilerine aınaldy. Bul óz eliniń tarıhı murasyna beı-jaı qaramaıtyn jas qazaqstandyqtardan quralǵan uıym. Búginginiń batyrlary desek te bolady. Óıtkeni, Ekinshi dúnıejúzilik soǵys kezinde habar-osharsyz ketkenderdi izdep, olardyń máńgi este qalýy úshin muraǵattyq-izdestirý jumystaryn júrgizip jatqandyqtary úlken erlik. Maıdanda soǵysqan 1,5 mıllıon qazaqstandyqtyń 270 myńy habar-osharsyz ketken. Arada talaı jyl ótti. Sol kezdegi kýágerlerdiń kóbi búginde ómirde joq. ıAǵnı, derekterdiń joıylǵanyna baılanysty iz-túzsiz joǵalǵandardy tabý óte qıyn. Soǵan qaramastan «Atamnyń amanaty» uıymy tabandylyq tanytyp, talaı sarbazdy tabýǵa eńbek sińirip jatyr», - deıdi Danııar Esın.

Jalpy, «Atamnyń amanaty» músheleri soǵys kezinde habar-osharsyz ketken 600-den astam sarbazdy tapqan. 2019 jyly qoǵamdyq birlestik QR Qorǵanys mınıstrligi jáne Almaty, Aqmola, Qaraǵandy, Soltústik Qazaqstan oblystarynyń ákimdikterimen birlesip, Ekinshi dúnıejúzilik soǵys kezinde qaza tapqan 5 sarbaz ben ofıtserdiń súıekterin áskerı qurmetin saqtaı otyryp, saltanatty túrde elge jetkizgen bolatyn.

Marapattaý rásimine qatysqan Reseı yntymaqtastyǵy ókildiginiń basshysy Alekseı Koropchenko ata-babalarymyz týraly estelikterdi jańǵyrtýda «Atamnyń amanaty» qoǵamdyq birlestiginiń mańyzdylyǵyna toqtalyp, jastardyń sana-sezimin oıata alatyn úlken joba ekendigin atap ótti.

«Bul marapat – tarıhı jadymyzdy qalpyna keltirý úshin tynbaı eńbektenip júrgen zamandastarymyzdyń jumysyna berilgen baǵa. Biz «Rýhanı jańǵyrý» jobalarynyń akseleratsııasyndamyz. Osy oraıda óz tájirıbemizben bólisýge árdaıym daıynbyz», - deıdi «Atamnyń amanaty» basqarmasynyń tóraǵasy Murat Moldaǵalıev.