Atamqulov zymyran bólshekteri qulaıtyn aýdan aqsaqaldarymen kezdesýge ýáde berdi

ASTANA. QazAqparat - Torǵaı dalasyn zymyran bólshekteri qulaıtyn alań retinde paıdalaný máselesi túbegeıli sheshilgen joq. Bul týraly búgin Úkimet otyrysynan keıin BAQ ókilderine QR Qorǵanys jáne aeroǵarysh ónerkásibi mınıstri Beıbit Atamqulov málim etti, dep habarlaıdy QazAqparat.

«Bul másele áli túbegeıli sheshimin tappasa da qoǵam arasynda kóp kóterilip jatyr. Jergilikti bılikten de bul máselege qatysty habar keldi. Shynymdy aıtsam, jer bizde 120-shy aýdan dep eseptelinedi. Al jerdiń kólemin naqty aıta almaımyn. Sebebi zymyrandy ǵaryshqa ushyrar kezde onyń búkil traektorııasy, bólshekteri qaı jerge túsetindigi eseptelinedi. Bul óte aýqymdy jumys bolǵandyqtan zerteý sharalary aıaqtalǵannan keıin ǵana zymyran bólshekteri qulaıtyn aýdannyń kólemin eseptep shyǵaramyz», - dedi ol.
Mınıstrdiń dereginshe, ár zymyrannyń 2 satyda jerge qulaıtyn 4 bólshegi bolady. Máselen, 60 jyldyń ishinde 1 500 zymyran aspanǵa kóterilgen. ıAǵnı, osy jyldardyń ishinde zymyrannyń 6 myń bólshegi jerge qulaǵan. Onyń ishinde birinshi satydaǵy bólshekter ǵana Qazaqstan jerine túsedi. Ekinshi satyda bólshekter Reseıdiń Altaı, Sibir aýmaǵyna qulaıdy. Jerge túsken zymyran bólshekteri bir kúnniń ishinde jınap alynyp, joıylady.
«Jalpy bul másele meniń baqylaýymda. Ótkende sol aýdan aqsaqaldarynan hat aldyq. Qazir naqty jumystar júrgizilip jatyr. Sebebi bul Úkimettiń jeri, ony «Báıterek» birlesken kásiporyny ýaqytsha jalǵa alǵan. Qazir biz ol jer qalaı paıdalanylyp jatyr, qansha paıda ákeldi degen máselelerdiń bárin esepteýimiz kerek. Máselen, bıyl 6 aıda «Baıqońyrdy» jalǵa berýden 18 mlrd teńge aqsha bıýdjetimizge tústi. Ótken jyldyń sońynda 12 mlrd túsken edi. Demek, bir jyldyń ishinde 30 mlrd teńge aldyq. Munyń barlyǵy elimizdiń bıýdjetine túsip, ekonomıkamyzdy kóterýge jumsalýda», - dedi Beıbit Atamqulov.
Mınıstrdiń aıtýynsha, zymyran bólshekteri qulaýy múmkin aýdan egindik, sýarmaly jer emes.
«Kóktemde, jer kóktegende mal jaıylýǵa shyǵady. Al mamyr aıynan ol jerdiń shóbi kúıip ketedi. Tóńireginiń bári tuzdy. Qazir biz sol jerdi kim, qalaı paıdalanatynyn zerttep jatyrmyz. Meniń orynbasarym Nurǵojın jumys tobyn basqarýda. Mamandarymyz sol jerdi zertteýde. Sodan keıin ózim baryp, halyqpen, aqsaldarmen kezdesemin, túsindiremin», - dep ýáde berdi mınıstr.