Atamqulov ýtılızatsııalyq alym jaıly: Qazaqstandyq óndirýshilerdi qoldaýymyz kerek
«Úkimettiń bul baǵytta qabyldaǵan jumystarynyń basymdyqtary men kemshilikteriniń bárin tereń taldaýymyz kerek. Búgingi tańda ýtılızatsııalyq alym men Úkimet jasaǵan qadamdar Qazaqstandaǵy aýyl sharýashylyǵy tehnıkasynyń óndirisin yntalandyryp otyr. Aýylsharýashylyq tehnıkalary óndirisin yntalandyra otyryp, jańa óndiristi, jańa jumys oryndaryn quramyz», - dedi Beıbit Atamqulov Úkimettiń baspasóz ortalyǵynda ótken brıfıngide.
Mınıstrdiń aıtýynsha, 28 tamyzda nemistiń jetekshi «Claas» kompanııasymen kelisim jasaldy.
«Biz jalpy, osy jumysty retteý úshin 10 jyldaı eńbek ettik. Bul - óte salmaqty naryq. Aýyl sharýashylyǵy tehnıkasynyń naryǵynda básekelester kóp. Bizdiń naryqta da olardyń kóptegen brendi bar. Bizge qoldaý bildirgen nemis seriktesterge alǵys aıtamyz. Naryqtar aýqymyna qatysty qaýip baryna qaramastan, qazirdiń ózinde 200 kombaın qurastyryla bastady», - dedi mınıstr.
Beıbit Atamqulov bul rette, Úkimetten qoldaýdyń kerek bolǵanyn jetkizdi.
«Kelesi jyldan bastap birtindep lokalızatsııa baǵdarlamasyn bastap, ony 20-dan 40 paıyzǵa jetkizýdi kózdep otyrmyz. Jalpy, ýtılızatsııalyq alymǵa jumsap jatqan qarajat Qazaqstanda jańa jumys oryndaryp quryp jatqanyn erekshe atap ótkim keledi. Ekinshiden, Qazaqstanda jumys isteıtin óndirýshilerge aýyl sharýashylyǵy ónimderi boıynsha lızıng usynamyz. Osy jospar negizinde 22 myń aýyl sharýashylyǵy tehnıkasy jańartylady. Bul jospardy bizdiń mınıstrlik aldaǵy úsh jylǵa qoıyp otyr. Álbette ýtılızatsııalyq alymǵa qatysty áli de pikirtalastyń artatyny anyq. Alaıda, biz birinshi kezekte, qazaqstandyq óndirýshilerdi qoldaýymyz kerek», - dedi Beıbit Atamqulov.