Atamqulov Astanadaǵy ǵarysh apparattary kesheniniń daıyndyǵy týraly baıandady

ASTANA. QazAqparat  -  Aǵymdaǵy jyly Astana qalasynda ǵarysh apparattaryn qurastyrý-synaý kesheniniń qurylysyn aıaqtaý jáne 2018 jyly ony sheteldik tapsyrystardy alý úshin halyqaralyq standarttar boıynsha sertıfıkattaýdy bastaý josparlanyp otyr.

 Bul týraly Parlament Májilisindegi Úkimet saǵatynda QR Qorǵanys jáne aeroǵarysh ónerkásibi mınıstri Beıbit Atamqulov málim etti, dep habarlaıdy QazAqparat.

Bul rette tájirıbelik óndirisi bar arnaýly konstrýktorlyq-tehnologııalyq bıýrony (AKTB) paıdalanýǵa berýdi osy jyly aıaqtaý josparlanyp otyr.

«Qazirgi ýaqytta keshenniń ǵımaraty boıynsha qurylys-montaj jumystary 45 paıyzǵa, tájirıbelik óndirisi bar AKTB ǵımaraty boıynsha 95 paıyzǵa oryndaldy. Keshenniń synaý ýchaskeleriniń barlyq tehnologııalyq jabdyǵy ázirlendi jáne zaýyttyq synaýdan oıdaǵydaı ótti. Osy strategııalyq nysannyń bolýy ǵarysh qyzmetin damytýǵa orasan zor kúsh beredi jáne Qazaqstanǵa jer serikterin jobalaý jáne jasaý boıynsha qyzmet kórsetetin halyqaralyq naryqqa shyǵýǵa múmkindik týǵyzady» - dedi B. Atamqulov.

Mınıstr salmaǵy 100 keliden 6 tonnaǵa deıingi jer serikterin jobalaýdan qurastyrý men synaýǵa deıin, sondaı-aq jer serikterine arnalǵan quramdaýyshtardy ázirleý jumystary atqarylatynyn atap ótti. Barlyq jumysty qazaqstandyq mamandar júrgizetin bolady, bul qazaqstandyq qamtýdy jer serikteriniń túri men maqsatyna baılanysty 55 paıyzǵa deıin jetkizýge múmkindik beredi.