Atamekenniń burynǵy basshysy Abylaı Myrzahmetovtiń soty jabyq ótedi — sýdıa
«Memlekettik aıyptaýshy qylmystyq isti jabyq sot rejıminde qaraý jóninde ótinish berdi. Prokýrorǵa kýáger G. jeke basy men otbasy músheleriniń qaýipsizdigin ýaıymdaıtynyn aıtyp, isti jabyq qaraýdy suraǵan. Aıyptaýdyń mán-jaıyn eskere otyryp, kýágerler men onyń otbasy músheleriniń qaýipsizdigin qamtamasyz etý maqsatynda sot memlekettik aıyptaýshynyń ótinishin qanaǵattandyrý jáne osy qylmystyq isti jabyq sot otyrysynda qaraý qajet dep sanaıdy», — dedi sýdıa Aıjan Kúlbaeva.
Buǵan deıin habarlaǵanymyzdaı, prokýror Baýyrjan Shekenov sotty jabyq ótkizýdi suraǵan edi.
Ótinishte sotqa qatysatyn jábirlenýshilerdiń, kýágerlerdiń, olardyń otbasy músheleri men jaqyn týystarynyń qaýipsizdigin qamtamasyz etý qajettigi aıtylǵan.
Eske sala keteıik, «Atameken» ulttyq kásipkerler palatasynyń burynǵy tóraǵasy Abylaı Myrzahmetov ótken jyly 10 mamyrda ustalǵan edi.
Antıkor taratqan aqparatqa sáıkes, ol alaıaqtyq jáne kásipkerdi týysyn qylmystyq jaýapkershilikten bosatýǵa járdemdeskeni úshin asa iri kólemde para berýge ıtermeledi degen kúdikke ilikti.
«Atameken» UKP eks-basshysyna qatysty is byltyr 21 jeltoqsanda sotqa jetti.