«Atameken» UKP: Jer qatynastary - jemqorlyq dendegen bes salanyń biri

ASTANA. QazAqparat - Jer qatynastary - elimizdegi sybaılas jemqorlyq dendegen bes salanyń qataryna engen. Bul týraly búgingi otyrysta «Atameken» UKP Kásipkerlerdiń quqyǵyn qorǵaý jáne sybaılas jemqorlyqqa qarsy is-qımyl jónindegi Keńesiniń múshesi Nurlan Qudaıbergenov málim etti, dep habarlaıdy QazAqparat tilshisi.

«Bıznes ókilderiniń pikirinshe, jer qatynastary - jemqorlyq dendegen sala.  Oǵan «Strategııa» áleýmettik jáne saıası zertteýler ortalyǵy» qoǵamdyq qorynyń júrgizgen zertteý nátıjeleri dálel. Sondaı-aq, «Nur Otan» partııasy jyl saıyn júrgizetin «Sybaılas jemqorlyqty qabyldaý ulttyq ındeksiniń» qorytyndysy boıynsha jer qatynastary elimizde sybaılas jemqorlyq eń qatty dendegen bes salanyń biri bolyp tanylǵan», - deıdi ol.

Nurlan Qudaıbergenovtyń aıtýynsha, ruqsat qujattaryn berýdegi vedomstvoaralyq maquldaýdyń ashyq júrgizilmeýi, ókiletti tulǵanyń «kómeginsiz» jer máselesi boıynsha naqty ári tolyq aqparatty alý qıyndyǵy, jer ýchaskelerine quqyq berýde memlekettik organdardyń ýájsiz nemese negizsiz bas tartýy jer qatynastarynda ákimshilik kedergiler týdyryp, munyń sońy sybaılas jemqorlyq áreketterine ákelip otyr. 

«QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń málimeti boıynsha, 2017 jyly jer qatynastary salasynda 150 sybaılas jemqorlyq qylmysy anyqtalǵan. Jemqorlyq jaǵdaılary ásirese Mańǵystaý oblysynda (50), Jambyl oblysynda (42), Pavlodar oblysynda (22) tirkelgen. Onyń ishinde para alý, alaıaqtyq, jer ýchaskelerin berýde qyzmettik laýazymdy asyra paıdalaný faktileri basym», - deıdi Nurlan Qudaıbergenov.

Otyrys barysynda baıandama jasaǵan «Atameken» UKP ókili quqyq buzýǵa ıtermeleıtin sebepterdiń qatarynda bos jer telimderi týraly aqparattyń bolmaýy, jer alý kezeginiń saqtalmaýy baryn aıtady.

«Buǵan qosa, jerdi saýdalaý kezinde baıqaý komıssııasy qurylady. Al, kóp jaǵdaıda komıssııa quramyna múddeli laýazymdy tulǵalar ǵana kiredi. Osylaısha, ókiletti organ tarapynan jergilikti atqarýshy organdar jumysyna degen laıyqty baqylaýdyń bolmaýy zań buzýǵa qolaıly jaǵdaı týdyrady. Óńir kásipkerleriniń áli de bos jerlerge qol jetkizý múmkindigi tómen. Al, aýyl sharýashylyǵyna arnalǵan aýqymdy arnaıy jer ýchaskeleri ıgerilmeı bos jatyr. Bos jer ýchaskeleri týraly aqparatty alý úshin agroónerkásip kesheni sýbektileri jergilikti atqarýshy organdarǵa birneshe ret ótinim jasaýǵa nemese laýazymdy qyzmetkerlerge shyǵatyn ózge jol izdeýge májbúr», - deıdi ol.

Jer qatynastary máselesin kótergen «Atameken» UKP ókilderi jıyn qorytyndysy boıynsha ókiletti organdarǵa oryn alǵan máseleniń quqyqtyq jaǵyn kúsheıtý, sonymen qatar jer qatynastaryndaǵy retteý men baqylaý júıesin jańǵyrtýdy usynyp otyr.