«Atameken» UKP Tuńǵysh Prezıdentke alǵys bildirdi
«Nursultan Ábishuly, Sizdiń bastamańyzben Qazaqstanda «Atameken» Ulttyq kásipkerler palatasy quryldy. Osylaısha otandyq kásipkerlerdiń ortaq shańyraǵyna aınalyp, álemdik naryqta el bıznesiniń teń dárejede ózin tanytýyna bar múmkindikter jasaldy. Sizdiń ustanǵan syndarly saıasatyńyzdyń arqasynda elimizde kásipkerlikpen aınalysamyn degen azamattarǵa teńdessiz múmkindikter jasalyp, Qazaqstannyń bızneske qolaıly jaǵdaıdy qalyptastyrǵany elenip, álemdik Doing Business reıtingisinde aldyńǵy otyz eldiń qataryna endi», - dep atap ótedi el kásipkerleri.
Kásipkerler dereginshe, búginde elimizde 1,2 mıllıonnan astam kásipker bıznesin júrgizýde.
«Bul eń aldymen Sizdiń júrgizgen ekonomıkalyq reformalaryńyzdyń nátıjesi! Qarapaıym metallýrgtan bastalǵan eńbek jolyńyz barshamyzǵa eńbekke degen adaldyqty, Otanǵa degen qurmetti dáripteıtin baǵa jetpes úlgi! Bir ǵana Sizdiń ómir jolyńyz mıllıondaǵan otandastarymyzdyń jarqyn bolashaqqa, óziniń qabileti men múmkindigine degen senimin eseleı tústetinin atap ótkimiz keledi. Biz, Qazaqstan kásipkerleri, elimizdiń damý baǵyty Siz salǵan sara jolmen júretinine senimdimiz. Kez kelgen úlken istiń qalaı damıtynyn alǵashqy qadamdar aıqyndaıdy. Kez kelgen memlekettiń ekonomıkasy onyń bıznesiniń damýymen tikeleı baılanysty. Al bıznestiń turaqty damýyn qamtamasyz etetin elimizdegi basty tuǵyrdy Siz qalap berdińiz!», - dep atap ótedi «Atameken» UKP.
Sonymen qatar onda bıznes-qaýymdastyq Elbasy artqan mindetterdi, qoǵam aldyndaǵy áleýmettik jaýapkershilikti tolyq sezinetindigi, eldiń strategııalyq maqsattaryn oryndaýda bar kúsh-jigerin salatyndyǵy aıtylǵan.
«Sizge zor densaýlyq, barlyq isińizge sáttilik pen uzaq ǵumyr tileımiz! Sizdiń ómirlik tájirıbeńiz ben danalyǵyńyz Qazaqstannyń ári qaraı órkendeýine cerpin beretinine nyq senimdimiz!», - dedi el kásipkerleri.