«Atameken» kásipkerler palatasyn qaldyrý qajet pe – talqylaý júrip jatyr
Otyrysta talqylanǵan máseleniń biri – palatanyń jumysyn saqtap qalý boldy.
Palatanyń Almatydaǵy óńirlik keńesiniń basshysy Maksım Baryshevtiń aıtýynsha, UKP jumysyn jalǵastyrý týraly másele óńirdegi sezdiń kún tártibinde bolǵan.
«Barlyǵy bir aýyzdan UKP-ny qaldyryp, ony reformalaý kerek dep daýys berdi. Búgin de sharamyzdy jalǵastyrý úshin osyndaı máseleni daýysqa shyǵarýdy usynamyn»,-dedi ol onlaın-kezdesýde.
Sonymen birge, Qaıtalama metallýrgııa ónerkásipshileri odaǵynyń tóraǵasy Vladımır Dvoretskıı de mundaı taqyryptyń kóterilýine negiz bar ekenin, sondyqtan jan-jaqty taldaý júrgizý qajettigin aıtty.
«Meniń oıymsha, qazir elde múmkindikter terezesi paıda boldy, biz ony mindetti túrde paıdalanýymyz kerek. Qazir renjıtin ýaqyt emes, barlyq faktilerdi jaıyp salyp, tıisti sheshimder qabyldanýy kerek, qazir kúsh salsaq, bir jyldan keıin múldem basqa elge aınalarymyzǵa senimdimin», - dedi V. Dvoretskıı.
Óz kezeginde «Atameken» UKP Basqarma tóraǵasy Abylaı Myrzahmetov Palatany qaldyrý týraly sheshimdi joǵary organ retinde Sezd qabyldaıtynyn túsindirdi. Onyń aıtýynsha, Sezdi shaqyrý naýryzdyń ekinshi bóligine josparlanǵan.
Óńdeý ónerkásibi odaǵynyń basshysy Ádilbek Bektibaev Sezde palatany maqtap, ony saqtap qalýdy ǵana suramaı, bıznes úshin qandaı jumys istegenin de aıtý kerek degen pikir bildirdi.
«Palata bıznes úshin eshteńe jasamady dep oılaıtyndar bar. Men onda obektıvti ashyq pikirler bolǵanyn jáne eki taraptyń da tyńdalǵanyn qalaımyn», - dedi Á. Bektibaev.
Jalpy «Atameken» Ulttyq kásipkerler palatasyn transformatsııalaý jónindegi jumys tobyna barlyq óńirden 89 adam, onyń ishinde kásipkerler, túrli salalardaǵy salalyq komıtetterdiń ókilderi kirdi. Qazirgi ýaqytta olar UKP-ny transformatsııalaý boıynsha 360 usynys jınady. Talqylanǵan taqyryptar qatarynda UKP qurylymy men qyzmeti, qaýymdastyqtardy akkredıtteý rásimderin jetildirý, normatıvtik-quqyqtyq aktilerdi saraptaý, múshelik jarnalar men aqyly qyzmetterdi engizý boıynsha usynystar bar. Sondaı-aq, jumys tobyna kásipkerlerden bıznestiń 400-ge jýyq problemalyq máseleleri joldanǵan.