«Atameken» etno-memorıaldyq kesheninde Á.Bókeıhannyń 150 jyldyǵyna oraı shara ótkiziledi

ASTANA. QazAqparat - 18 mamyrda Halyqaralyq mýzeı túnine oraı «Atameken» Qazaqstan kartasy» etno-memorıaldyq kesheninde bir qatar merekelik mádenı is-sharalar jáne dóńgelek ústel basqosýy ótedi. Merekege oraı kóptegen baǵaly syılyqtary bar lotoreıa oınatylady dep kútilýde.

Alash jurtynyń kórnekti qaıratkeri, uly tarıhı tulǵa Álıhan Bókeıhannyń dúnıege kelýine 150 jyl tolǵan qurmetine arnalǵan «Qazaq jeriniń bútindigi jáne  Á.Bókeıhannyń ıdeıalyq ustanymy» atty dóńgelek ústel ótedi. Atalmysh sharaǵa elimizdiń zııaly qaýym ókilderi, ǵalymdar, Parlament depýtattary qatysyp, taqyrypty talqylaıdy. Sońynda arnaıy dastarhan jasalady.

El táýelsizdiginiń 25 jyldyǵy men «Atameken-Qazaqstan kartasy» etno-memorıaldyq kesheniniń 15 jyldyq merekesi arasynda tyǵyz sabaqtastyq bar.

 «Atameken-Qazaqstan kartasy» etno-memorıaldyq kesheni - táýelsizdiktiń alǵashqy jyldarynda tolyqtaı mejelengen shekaramyzdy, keń baıtaq elimizdiń aýmaǵyn tutastaı qamtyǵan túrli tabıǵı kórinisterdi, tarıhı qundy eskertkishterdi, ár aımaqtyń ózine tán sáýletti qurylys nysandaryn beınelegen maketterden turatyndyǵyn eskersek, bizdegi ár jádiger keıingi jas býyndy otanshyldyq rýhqa jeteleıtindigin erekshe atap aıtý lázim.