Atam men ákemniń «Aqtaldy» degen haty áli kúnge deıin saqtaýly tur – Sultanbek Qojanov
Kentaý transformator zaýytyndy qyzmet atqaratyn Sultanbek búginge deıin ákesi men atasy jaıly birshama málimetterdi jınaǵan. Kitap jazdyryp ta, kópshilikke usynypty. Bar maqsaty - atasy men ákesi týraly tyń derekterdi tolyqtyryp, eńbegin nasıhattaý.
«Ákem aǵasy Sultanbek jaıynda kóp aıtyp otyratyn. Eldi asharshylyq jaılaǵan kezde ol 12-13 jasar bala bolypty. Temir torǵa qamalardyń aldynda inisi aǵasymen bir táýlik boıy sóılesken eken. Sodan erteńine túnde eki soldat kelip atamdy alyp ketipti. Alǵashynda aýdandyq túrmede bir aıǵa jýyq jatypty. Keıin qaıda ketkeni belgisiz», deıdi ol.
Keıinnen bala Sultanbektiń ákesi Seıdollany da Sozaqtan ustap, Qaraǵandynyń túrmesine deıin jaıaý alyp barǵan. Odan jer aýdaryp Sibirge jibergen. Jalpy jaratýshymyz ózi jar bolyp, kómektesken bolar, Seıdolla Qojanov sol kezdegi atý jazasynan aman qalypty. «Tamaq, sý degen múldem joq. Kúnine bolar-bolmas nanǵa júrek jalǵap kúneltken eken. Aıaqtarynyń saýsaqtary úsip ketken. Qıynshylyqty kóp kórgen. Túrmeden bosatylǵan soń birden Saryaǵashtaǵy Qamar aǵasynyń úıine barǵan. Keıin Aqsúmbege oraldy»,- deıdi Sultanbek. Arada birshama ýaqyt ótken soń, Kentaý qalasyna qonys aýdarǵan Seıdolla Qojanov kóptegen jyldar boıy shahtada jumys istedi. Sonda da organ qyzmetkerleri halyq jaýy dep qaıta-qaıta tıisip, tynyshtyq bermepti. Qanshama qıyndyq kezdesse de moıymaı, abyroıly eńbek etip zeınetke shyqty.
«Sultanbek atam men Seıdolla ákeme «Aqtaldy» dep Máskeýden hat keldi. Ol úıde áli kúnge deıin saqtaýly tur» - deıdi ol.
Búginde Qojanovtar áýletinen taraǵan urpaqtar Kentaý qalasynda turady. Al, atasymen attas Sultanbek óndiris salasynda eńbek etip júr. Bos ýaqytynda kitaphanaǵa baryp atasy men ákesi jaıyndaǵy estelikterdi jınaqtaýmen shuǵyldanady. Ǵylymı konferentsııalarǵa qatysyp tyń málimetterdi izdestiredi.
«Meniń atymdy: «Sultanbek aǵamnyń aty óshpesin, umytylmasyn», dep ákem qoıǵan eken. Búginde ózim de ul-qyz ósirip otyrmyn. Nurdáýlet, Nurasyl, Albına, Álııa esimdi ul-qyzdarym bar. Olar da atalary jaıly óleńderdi, qarasózderdi jattap alǵan. Mektebinde úlken maqtanyshpen aıtyp júredi. 31 mamyr – saıası qýǵyn-súrgin qurbandaryn eske alý kúninde jáne atam men ákemniń qaıtys bolǵan kúnderinde aǵaıyn-týysty jınap, arýaǵyna jyl saıyn quran baǵyshtap turamyz. Atam Sultanbek Qojanovtyń jerlengen jeri Máskeý shetindegi «Kommýnarka» zıratynan tabylǵanda áýletimizben qatty qýandyq. Eldi jınap as berdik. Arnaıy delegatsııa týǵan jeri Aqsúmbeniń topyraǵyn zıratyna salyp keldi. Keıinnen kitap shyǵardyq. Endigi armanym atam men ákemniń ómirinen syr shertetin kıno túsirsek eken deımin» – deıdi atasymen attas Sultanbek Qojanov.