Ataqty brıtandyq aqyndar II dárejeli «Dostyq» ordenimen marapattaldy
Marapat Qazaqstan Respýblıkasy Prezıdenti Qasym-Jomart Toqaevtyń Jarlyǵymen Qazaqstan men Ulybrıtanııa jáne Soltústik Irlandııa Qurama Koroldigi arasyndaǵy dostyq pen yntymaqtastyqty nyǵaıtýǵa qosqan eleýli úlesi úshin, sondaı-aq qazaqtyń uly aqyny, fılosof jáne aǵartýshysy Abaı Qunanbaıulynyń murasyn halyqaralyq arenada ilgeriletýge sińirgen eńbegi úshin berildi.
Eki aqyn Abaı shyǵarmalarynyń aǵylshyn tilindegi alǵashqy tolyq jınaǵyn Kembrıdj ýnıversıteti baspasynda daıyndap, basý jobasyna tikeleı qatysty. «Ulttyq aýdarma bıýrosy» QQ-men (UAB) seriktestikte júzege asyrylǵan joba sheńberinde tanymal brıtandyq aqyn professor Sh.O’Braıen Abaı poezııasynyń aýdarmasyn daıyndady, al qara sózderdi tárjimalaý mindeti belgili shotland jazýshysy jáne aqyny professor Dj.Bernsaıdqa júkteldi. Aǵylshyn tilindegi basylym – aty ańyzǵa aınalǵan qazaq aqynynyń shyǵarmalaryn álemniń on tilinde jarııalaý jónindegi UAB-nyń aýqymdy jobasynyń bir bóligi.
Ordenderdi tabystaý rásiminde Qazaqstannyń Ulybrıtanııadaǵy Elshisi Erlan Ydyrysov Qazaqstan Respýblıkasy Táýelsizdiginiń 30 jyldyǵyn merekeleý jylynda joǵary nagradalardy tapsyrýdyń sımvoldyq máni bar ekenin atap ótti. Ol sondaı-aq professorlar Dj.Bernsaıd pen Sh.O’Braıennyń jahandyq aǵylshyntildi aýdıtorııa arasynda uly Abaıdyń murasyn tanymal etýge jáne eki el mádenıetterin ózara jaqyndastyrý isine qosqan zor úlesterin atap ótti.
Aıta ketken jón, professor Shon O’Braıen – brıtandyq aqyn, synshy, dramatýrg, telejúrgizýshi, jazýshy, redaktor, Nıýkasl ýnıversıtetiniń shyǵarmashylyq jazýdyń burynǵy professory. Onyń marapattaryna T.S.Elıot syılyǵy, «Forward Prize», Somerset Moem syılyǵy jáne basqalar kiredi. «Gardıan», «Independent» jáne «Taıms» gazetterinde maqalalar jarııalaǵan.
Al professor Djon Bernsaıd – shotland aqyny jáne jazýshysy, Sent-Endrıýs ýnıversıtetiniń aǵylshyn tili professory. Poezııa men prozanyń birqatar jınaqtaryn jarııalaǵan, telehıkaıalar men radıo shoýlarǵa arnalǵan stsenarıılerdiń avtory. T.S.Elıot, «Forward Prize», O.Genrı syılyqtarynyń jáne basqa da kóptegen marapattardyń laýreaty. Onyń shyǵarmalarynyń aýdarmalary Germanııa, Frantsııa, Ispanııa, Italııa, Túrkııa, Nıderland, QHR, Indonezııa, Horvatııa, Brazılııa jáne Argentınada basylǵan.