Ataqty aǵylshyn fýtbolshysy 100 mln eýroǵa «Bavarııaǵa» aýysty

LONDON. QazAqparat - Anglııa quramasynyń kapıtany jáne tarıhtaǵy eń tabysty aǵylshyn fýtbolshylarynyń biri Garrı Keın Germanııanyń «Bavarııa» klýbymen kelisimshartqa otyrdy. Mámile quny - 100 mln eýro, dep habarlaıdy QazAqparat BBC jańalyqtaryna silteme jasap.

30 jastaǵy Keın aldaǵy senbide nemis sýperklýby «RB Leıptsıgke» qarsy oınaǵan kezde alańǵa shyǵa alady.

Aǵylshyn shabýylshysy «Tottenhem» sapynda 435 oıyn ótkizip, 280 gol soqqan. Ol - komanda tarıhyndaǵy eń ónimdi oıynshy.

Keın - osy klýbtyń fýtbol akademııasynyń túlegi, 2004 jyly sonda jattyǵa bastaǵan. Al 2011 jyly alǵash ret eresekter komandasy quramynda alańǵa shyqty.

«Tottenhem Hotspýr» klýby sapynda úsh ret Aǵylshyn Premer-Lıgasynyń «Altyn býtsyn» jeńip aldy. Taıaýda ǵana 58 halyqaralyq golmen Anglııa tarıhyndaǵy eń kóp gol soqqan shabýylshy atandy.

Alaıda Keın bir de bir negizgi halyqaralyq týrnırde jeńimpaz bolmaǵan. Ne óz klýbynyń quramynda, ne Anglııa quramasy atynan qatysqanda da chempıon atana almady.

2020 jylǵy fýtboldan álem chempıonatynda Keın bastaǵan Anglııa quramasy jartylaı fınalda Frantsııadan, 2021 jyly Eýropa chempıonatynyń fınalynda Italııadan utyldy.

«Bavarııaǵa» qosylǵanyma óte qýanyshtymyn. Bavarııa - álemdegi eń myqty klýbtardyń biri. Buǵan deıin sport jolymda myqtylarmen básekege túsip, joǵary deńgeıde óner kórsetkim keletinin únemi aıtyp júretinmin. Klýbta jeńimpazdar psıhologııasy kórinip tur, ózińdi jaıly sezinesiń», - deıdi Keın.

«Bavarııa» quramynda Keın toǵyzynshy nómirli jeıde kıedi. Onyń kelisimshartynyń merzimi - 2027 jylǵa deıin.

Ótken maýsymda Bavarııa 33-ret (jáne qatarynan 11-shi) Býndeslıga chempıony atandy. Klýb alty ret Chempıondar lıgasyn jeńip alsa, 20 ret Germanııa kýbogyn ıelengen.