Ataqty fýtbolshy Maradonanyń balalary sotqa shaǵymdandy

<p>ASTANA. KAZINFORM &ndash; Argentınanyń baǵyna týǵan dańqty sportshy Dıego Maradonanyń muragerleri 1986 jylǵy álem chempıonatynda fýtbolshyǵa berilgen &laquo;Altyn doptyń&raquo; aýktsıonǵa qoıylýyna qarsy shyǵyp, sotqa shaǵymdandy.</p>

Álem chempıonatynyń úzdik oıynshysyna beriletin «Altyn dop» júldesi jumbaq jaǵdaıda joǵalyp ketken edi. Ondaǵan jyldar boıy tabylmaǵan júlde jýyrda aıaqasty paıda bolyp, tipti 6 maýsymda Parıjde aýktsıonǵa shyǵarylatyny habarlandy.

Marqum Maradonanyń muragerleri júldeniń qazirgi ıesi kýbokty satýǵa quqyǵy joq ekenin alǵa tartyp otyr. Ataqty fýtbolshynyń eki qyzynyń múddesin qorǵaıtyn advokat Jılles Morıer Nanter sotynyń tóraǵasynan «Altyn dopty» aýktsıonnan alyp tastaýdy suraıtynyn aıtty. Sondaı-aq ol júldeni urlaý boıynsha shaǵymdanatynyn jetkizdi.

Boljamdarǵa sáıkes, bul júlde qaryzdy óteý úshin satylǵan bolýy múmkin. Taǵy bir boljamǵa súıensek, Neapol bankteriniń biriniń seıfinde saqtalǵan júldeni jergilikti qylmystyq toptar urlap ketken.

Maradonanyń qyzdary kýboktyń urlanǵanyn jaqynda ǵana bilgenin alǵa tartyp otyr. Advokattyń aıtýynsha, fýtbolshynyń otbasy «Altyn dopty» ózderine tıesili dep sanaıtyndyqtan, onyń satylýyna qarsy.

Aguttes aýktsıon úıi basshylyǵynyń aıtýynsha, júldege ıelik etken adam onyń urlanǵanyn bilmegen.

Sarapshylar eger júlde aýktsıonda satylsa, biregeıligine baılanysty kóp tabys ákeletinin boljap otyr. Dese de, bul iske qatysty sot qandaı sheshim shyǵaratyny áli belgisiz.

Esterińizge salsaq, Maradona 2020 jyly 25 qarashada 60 jasynda qaıtys boldy. FIFA resmı saıtyndaǵy daýys berý nátıjesi boıynsha argentınalyq 20-ǵasyrdyń úzdik fýtbolshysy bolyp tańdalǵan bolatyn.

Buǵan deıin Dıego Maradona 36 jyl buryn daýly gol soqqan dop aýktsıonǵa shyǵarylǵan edi.