Ata-anamyz Qazaqstan jerine alǵys aıtyńdar dep amanat qaldyryp ketti - Lıýdmıla Tıan

ASTANA. QazAqparat - Astanadaǵy Koreıanyń mádenıet ortalyǵynyń ókili, elordalyq turǵyn Lıýdmıla Tıan búgin barlyq otandastaryn Qazaqstan halqynyń birligi kúnimen quttyqtady.

«Biz Qazaqstan Prezıdenti Nursultan Nazarbaevty qaıta saılaǵanymyzǵa qatty rızamyn. Sebebi mundaı halyqtyq merekeniń toılanýy - sol kisiniń arqasy. Bul kóktemniń beıbitshilik pen tatýlyqqa úndeıtin ádemi merekesi. Osynaý ataýly kúnmen barsha qazaqstandyqtardy quttyqtaǵym keledi. Ashyq aspan, ál-aýqat tileımin!» - dep atap ótti ol «QazAqparat» tilshisine bergen suhbatynda.

Lıýdmıla Tıannyń aıtýynsha, onyń ata-anasy «stalındik kezeńde» Qıyr Shyǵystan jer aýdarylǵan jáne tek qazaq halqynyń meıirbandyǵynyń, qonaqjaılylyǵynyń arqasynda aman qaldy.

«Qıyr Shyǵystan Qazaqstanǵa sapar kezinde káriler men balalar shydamaı kóz jumdy. Tek jastar ǵana tiri qalǵan. Meniń ata-anam «basqa emes, dál osy Qazaqstan jerinde qalǵanymyz úshin Qudaıǵa alǵys aıtyp otyryńdar» dep óle-ólgenshe aıtyp ketti. Qazaqtar jalǵyz túıir nanymen bólisti, sý ishkizdi, basymyzǵa pana berdi. Biz osynda tiri qaldyq. Bizdiń ata-analarymyz sol kezeńdi kóz jasymen árdaıym eske alyp otyrdy. Endi mine, balalar ósti, nemereler paıda boldy. Osy jerdi qasıet tutamyz, syılaımyz», - dedi Lıýdmıla Tıan.