Ata-anam ózgelerge qamqor bolýǵa tárbıeledi – pavlodarlyq volonter

<p>Pavlodarlyq Aıgúl Omarovanyń eriktiler qozǵalysyndaǵy eńbegi eren. Nemis tiliniń mamany áýel basta shetel tilin tegin úıretý kýrstaryn uıymdastyrýǵa qatyssa, ýaqyt óte jergilikti balalar úılerinde &laquo;Tálimger&raquo; atty jobany sátti júrgize bildi, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

Aıgúl Seıpollaqyzy búginde Qazaqstandaǵy Qyzyl jarty aı qozǵalysynyń belsendi múshesi. Byltyr qarasha aıynyń sońynda Ekibastuz qalasynda tótenshe jaǵdaı bolǵanda eldiń aldy bolyp kenshiler qalasynyń jurtshylyǵyna kómek kórsetti. Qaqaǵan aıazdyń qyspaǵynda qalǵan adamdarǵa jan-jaqtan aǵylǵan eriktiler kómekke baryp, jalǵyzbasty qarııalar men kópbalaly otbasylarǵa, múmkindigi shekteýli jandarǵa járdemdesti. Kúni-túni kóshede jantalasyp qubyr jamap júrgen jumyskerlerge ystyq tamaq pen shaı aparyp, olardyń tońyp qalmaýyn qadaǵalady.

«Kenshiler shaharyndaǵy halyqty tezirek qolaıly ómirge oraltý úshin apat saldarymen táýlik boıy jantalasqan jóndeý brıgadalarynyń jumyskerlerin de nazarymyzdan tys qaldyrmadyq. Olarǵa mezgil saıyn ystyq tamaq pen shaı tasydyq. Kóptegen páterlerdi aralap, halyqqa jyly kórpeler, jylytqyshtar, azyq-túlik, aýyzsý tasydyq. Esimde qalǵan bir oqıǵa, 12 qabatty úıdiń eń joǵarǵy qabatynda 5 balasy bar kópbalaly otbasy turdy. Apattan jylý túgili, elektr jaryǵy da sóngen, qubyrlardaǵy sý qatyp qalǵan. Lıfti jumys istemeıdi. Álgi páterge muz basqan baspaldaqpen jaıaý kóterilip, únemi kerek-jaraqtaryn aparyp járdemdestik. Úı ishinde qalyń kıinip, oınaýǵa murshasy joq, jaýrap otyrǵan kishkentaı balalardy kórip, júregimiz aýyrdy. Kópshilik bizdiń eńbegimizdi baǵalap, rızashylyq bildirgende óz isimizge degen yntamyz artady. Úlken ájeler bizdi kórse, „aınalaıyn“ dep alǵys aıtady. Bul bizdiń, eriktilerdiń, durys baǵytta jumys istegenimizdi kórsetse kerek. Qaladaǵy tehno­gendik sıpattaǵy tótenshe jaǵdaı re­jımi tolyq alynbaǵansha Ekibastuzdan ketken joqpyz», — deıdi volonter.

Foto: Aıgúl Omarovanyń jeke arhıvinen

Aıgúl Omarova — otbasyndaǵy 7 balanyń kenjesi. Erikti qazirgi ýaqytta ózge qozǵalys múshelerimen birge kolledjder men mektepterde sheberlik sabaqtaryn ótkizedi. Onda jasóspirimder men bozbala, boıjetkenderge qıyn jaǵdaıda qalǵan adamǵa alǵashqy bette qandaı kómek kórsetý kerektigi, jasandy tynys aldyrý, jarany, synyqty tańý ádisteri úıretiledi.

«Kishkene shaǵymnan áke-sheshem ózgelerge qamqor bolýdy, qoldan kelgen jaqsylyqty aıamaýdy úıretti. Qoǵamǵa paıdam tıse, sol qýanysh», — degen pikirde mereke ıesi.

Aıta ketsek, búginde Pavlodar oblysyndaǵy eriktiler qozǵalysynyń 22 myńnan astam múshesi bar. Bul baǵytta 22 uıym turaqty jumys istep tur. Aımaqtyq volonterlik front-ofıstiń jetekshisi Erkebulan Kúntýǵannyń aıtýynsha, eriktiler áleýmettik osal toptarǵa kómek kórsetý, joǵalyp ketken azamattardy izdestirý, Ekinshi dúnıejúzilik soǵysta habar-osharsyz ketkender jaıly málimetterdi anyqtaý, qaterli dertke shaldyqqandardy qoldaý turǵysynda tynbaı eńbek etedi.