Ata-ana qamqorlyǵynsyz erjetip jatqan balalar arasynda festıval ótti

NUR-SULTAN. QazAqparat - Jetim jáne ata-ana qamqorlyǵynsyz qalǵan balalarǵa arnalǵan uıymdardyń tárbıelenýshileri arasynda ótken «Qazaqstan – meniń altyn besigim» respýblıkalyq festıvaliniń qorytyndysy jarııalandy. Saıys «Alǵys aıtý» kúnine oraı uıymdastyryldy. Oǵan elimizdiń barlyq oblysynan 187 bala qatysty. Balalar vokaldyq, horeografııalyq sheberligin jáne teatrlyq ónerin kórsetti, dep habarlaıdy QazAqparat.

Jas ártister óz ónerlerin kameraǵa túsirip, ony onlaın formatta ótken baıqaýǵa jiberdi. Nátıjesinde úsh jas sanaty boıynsha bas júldeni otbasy úlgisindegi Tólebı balalar aýylynyń (Túrkistan oblysy), Ómirlik qıyn jaǵdaıda qalǵan balalardy qoldaý ortalyǵynyń (Jambyl oblysy), sondaı-aq «Atameken» otbasy úlgisindegi balalar aýylynyń (Qyzylorda oblysy) tárbıelenýshileri jeńip aldy.

«Tatýlyqtyń tutqasy – birliktiń besigi» atty halyq bıleri baıqaýynda bas júldeni Shymkent qalasyndaǵy №4 balalar úıiniń bı ujymy jeńip aldy.

Teatrlandyrylǵan baıqaýda Taldyqorǵan qalasyndaǵy «Aınalaıyn» balalar úıiniń tárbıelenýshileri jeńimpaz atandy. Balalar «Jýsan ısi» dramalyq qoıylymyn bir aıǵa jýyq daıyndaǵandaryn aıtty.

«Biz bas júldeni jeńip alamyz dep oılaǵan joqpyz, bul biz úshin tosyn syı boldy. Dramalyq qoıylymda oınaý ońaı emes, biraq biz bar jan-tánimizdi, sheberlik pen talantymyzdy jumsap, ónerimizdi barynsha ashýǵa tyrystyq», - dedi teatr ujymynyń múshesi.

Festıvaldiń barlyq jeńimpazy I, II, III dárejeli dıplomdarmen, gramotalarmen jáne baǵaly syılyqtarmen marapattaldy.

Olar smartfon, beınekamera, planshet, túsirilimge arnalǵan saqınaly sham aldy. Eshkim syılyqsyz qalmady, barlyq qatysýshyǵa smart saǵattar berildi.

«Festıvalge daryndy balalar qatysty. Olardyń qoıylymdaryn YouTube arnasynan kórýge bolady. Bul joba árbir qatysýshyǵa óz áleýetin barynsha arttyrýǵa múmkindik berip, sonymen birge qundylyqtar men básekege qabilettilik júıesin qalyptastyrýǵa yqpal etedi. Mundaı baıqaýlar balalardyń óz qurdastarymen ǵana emes, eresektermen de ujymda jumys isteýine kómektesedi», - deıdi QR BǴM Respýblıkalyq qosymsha bilim berý oqý-ádistemelik ortalyǵynyń dırektory Raısa Sher.

Atap keteıik, jetim jáne ata-anasynyń qamqorlyǵynsyz qalǵan balalarǵa arnalǵan uıymdardyń tárbıelenýshileri arasyndaǵy «Qazaqstan – meniń altyn besigim» respýblıkalyq festıvali QR BǴM Balalardyń quqyqtaryn qorǵaý komıtetiniń qoldaýymen júzege asyrylyp keledi.