Asyraýshysynan aıyrylǵandardyń járdemaqysy 14,5% ósedi

ASTANA. QazAqparat – 1 qyrkúıekten bastap asyraýshysynan aıyrylǵan azamattardyń járdemaqysy 14,5% ósedi. Bul usynysty Memleket basshysy Qasym-Jomart Toqaev VIII saılanǵan QR Parlamentiniń birinshi sessııasynda aıtty, dep habarlaıdy QazAqparat tilshisi.

«Asyraýshysynan aıyrylǵan azamattar nazardan tys qalmaýy kerek. Osy oraıda, Úkimetke atalǵan sanattaǵy adamdardyń járdemaqysyn orta eseppen 14,5 paıyzǵa kóbeıtýdi tapsyramyn. Muny bıylǵy 1 qyrkúıekten bastap qolǵa alý qajet. Qazaqstan bizdiń aımaqtaǵy osyndaı áleýmettik járdem beretin jalǵyz memleket deýge tolyq negiz bar», - dedi Qasym-Jomart Toqaev.

Prezıdent áleýmettik qoldaýdyń aldyn ala jáne shyn máninde muqtaj jandarǵa kórsetilýi qajettigin atap ótti.

«Degenmen, kez kelgen kómek masyldyqqa sebep bolmaýy kerek. Ásirese, eńbekke jaramdy jas azamattar járdemaqyǵa qol jaımaýǵa tıis. Densaýlyǵy myqty, kúsh-qýaty bar azamattar úshin bul – uıat nárse. Al, zııandy eńbek jaǵdaıynda jumys isteıtin adamdarǵa aıryqsha kóńil bólý kerek. Osyndaı jumysshylarǵa arnaıy tólem tóleý máselesin oılastyrǵan jón», - dedi Memleket basshysy.

Bul rette, elimizdegi jáne halyqaralyq tájirıbeni muqııat zerdeleý mańyzdy.

«Memlekettik kómek áleýmettik qaterdiń saldaryn joıýǵa emes, onyń aldyn-alý úshin berilýi qajet. Parlament pen Úkimet osy baǵytta birlese jumys isteýi kerek. Qazaqstan halyq partııasy men Jalpyulttyq sotsıal-demokratııalyq partııasynyń depýtattary áleýmettik máselelerdi sheshýge belsene atsalysady dep senemin», - dedi Qasym-Jomart Toqaev.