Asyraýshysynan aıyrylǵandardyń áleýmettik tólemderi ósedi

ASTANA. QazAqparat- QR Eńbek jáne xalyqty áleýmettik qorǵaý vıtse-mınıstri Svetlana Jaqypova asyraýshysynan aıyrylǵan jaǵdaıda áleýmettik tólemniń qalaısha ózgeretinin túsindirdi. Atalǵan tólemder mindetti áleýmettik saqtandyrý qorynan berilip otyrady. Búginde qordyń tólemderin arttyrý usynylyp otyr, dep xabarlaıdy QazAqparat tilshisi.

Vıtse-mınıstrdiń aıtýynsha, asyraýshysynan aıyrylǵan otbasylardyń áleýmettik qorǵalýyn arttyrý maqsatynda arnaıy koeffıtsıentti ózgertý kózdelip otyr. Sonyń nátıjesinde áleýmettik saqtandyrý qorynan beriletin tólemniń mólsheri ulǵaıady.

Máselen, mindetti áleýmettik saqtandyrý qoryna jarna aýdaryp kelgen adam asyraýshysynan aıyrylǵan jaǵdaıda onyń asyraýynda qalǵan adamdardyń koeffıtsıenti kóteriledi. Bir adam úshin 40 paıyzdan 50-ge, eki adam úshin 50-den 65 paıyzǵa, úsh adam úshin 60 paıyzdan 80-ge, al tórt jáne odan kóp adam bolsa 80-nen 100 paıyzǵa kóbeıtý usynylyp otyr. Jalpy alǵanda, árbir koeffıtsıenttiń ósimi burynǵy mólsherdiń 25 paıyzyn quraıdy.

«Máselen, asyraýshysynan aıyrylǵan adamnyń ortasha aılyq tabysy - 100 myń teńge. Al júıege qatysý ótili 85 aıdy quraıdy. Onyń asyraýyndaǵy bir adam úshin tólem mólsheri 23 907 teńge bolady. Bul qazirgi parametrdi qoldaný kezindegi tólem mólsherinen 30 paıyzǵa kóp. Búginde 18 390 teńge tólenip otyrady», - dedi S.Jaqypova QR Parlament Májilisinde ótken jıynda.

Onyń sózine qaraǵanda, asyraýshysynan aıyrylý boıynsha memlekettik áleýmettik járdemaqyny eskere otyryp, tólemniń jalpy somasy 43 910 teńgeden 49 448 teńgege artatyn bolady.

«Zań jobasy Májiliske endi keldi. Eger Májilis qabyldap, Senattan ótip, Elbasy qol qoıatyn bolsa, jospar boıynsha barlyq sharalar 2020 jyldyń 1 qańtarynan bastap júzege asady», - dep atap kórsetti S.Jaqypova.

Aıta keteıik, búgin QR Eńbek jáne xalyqty áleýmettik qorǵaý mınıstrligi Parlament Májilisiniń depýtattaryna mindetti áleýmettik saqtandyrý máseleleri boıynsha keıbir zańnamalyq aktilerge ózgerister engizý týraly zań jobasyn tanystyrdy. Vıtse-mınıstr Svetlana Jaqypovanyń aıtýynsha, zań jobasyn qabyldaýdyń nátıjesinde eńbek etý qabiletinen, asyraýshysynan jáne jumysynan aıyrylý boıynsha tólemderdiń ortasha mólsheri orta eseppen 30-36 paıyzǵa deıin artady. Halyq mindetti áleýmettik saqtandyrý júıesine kóbirek qatysady. Sóıtip, resmı túrde jumys isteıtin adamdardyń sany artady degen boljam bar.
Sondaı-aq, vıtse-mınıstr eńbek etý qabiletinen aıyrylýǵa qatysty áleýmettik tólemniń qalaısha ózgeretinin de túsindirdi.