Asyljan Bektaı aýyr atletıkadan Azııa chempıonatynda altyn aldy

ASTANA. QazAqparat - Qazaqstandyq ziltemirshi Asyljan Bektaı Bahreın astanasy Manamada ótip jatqan aýyr atletıkadan Azııa chempıonatynda 89 kelige deıingi salmaqta top jardy, dep habarlaıdy QazAqparat sportty damytý dırektsııasyna silteme jasap.

Qyzylordalyq sportshy julqa kóterýde 165 kelimen kúmis medal alsa, keıin 197 kg tasty serpe kóterip, altynǵa qol jetkizdi. Jalpy esepte 362 kelini eńserdi.

Kúmisti Asyljannan nebári bir kelige qalyp ketken qyrǵyz Emıl Moldodosov (361 kg) jeńip alsa, qola ırandyq Masýd Shatraıge buıyrdy (358 kg).

Osy salmaqta synǵa túsken taǵy bir qazaqstandyq Kırıll Staroverkın jalpy esepte 330 kelimen (153+177) 7-orynǵa turaqtady.

Asyljan 2017 jyly Bangkokte (Taıland) ótken aýyr atletıkadan 17 jasqa deıin jasóspirimder arasyndaǵy álem chempıonatynda qola júldeger atanǵan.

Ol 2000 jyly Qyzylorda oblysy, Shıeli aýdanynda dúnıege kelgen. 7 -synyptan bastap aýyr atletıka sektsııasyna qatysyp keledi.

Buǵan deıin jasóspirimder arasynda eki márte Qazaqstan chempıonatynyń (2015, 2017 jyldary) jáne kýbogynyń (2016 jyly) kúmis júldesin ıelendi.

Aýyr atletıkadan QR sport sheberi. Bapkeri – Qaldybaı Toqbaev.

Aıta keteıik, osyǵan deıin Manamada Zýlfııa Chınshanlo jeńimpaz atanyp, Arlı Chonteı qola júldege ıe bolǵan.