Asylov: Qylmystyq ister boıynsha túpkilikti sheshim halyqtyń nazaryna jetkiziledi

NUR-SULTAN. QazAqparat – Qańtar oqıǵasy boıynsha qylmystyq isterdiń túpkilikti sheshimi halyqtyń nazaryna jetkiziledi. QR Bas prokýrory Berik Asylov Májilistiń jalpy otyrsynda osylaı dedi, dep habarlaıdy QazAqparat tilshisi.

«Búginde jedel-tergeý is-sharalary jalǵasýda. Qylmyskerlerdi izdeý, dáleldemelerdi jınaqtaý men bekitý jumystary júrgizilip jatyr. Tergeý qupııasy jáne kinásizdik prezýmptsııasyna qatysty, zańnama talaptaryn eskerip, men, tergelip jatqan ister boıynsha shekteýli, derekterdi ǵana keltirdim. Esterińizge salaıyn, tergeý merzimi eki aıdan sál ǵana asty. Mundaı aýqymdy, tragedııanyń barlyq mán-jaıyn anyqtaý úshin, bul ýaqyt jetkiliksiz. Kóp jaǵdaıda kýálar joq. Keshendi sot saraptamalary jáne ballıstıkalyq zertteýler taǵaıyndaldy. Nátıjelerin kútýdemiz», - dedi Bas prokýror.

Onyń aıtýynsha, atalǵan jaıttar bári fıgýranttardyń qatysý dárejesi men rólin durys saralaý, uıymdastyrýshylar men oryndaýshylardy anyqtaý jáne urlanǵan qarýdy tabý úshin qajet.

«Deı turǵanmen, barlyq qylmystyq ister boıynsha, túpkilikti sheshimder, mindetti túrde, halyqtyń nazaryna jetkiziletin bolady», - dedi Berik Asylov.