Asyqtan tulpar «túıgen» sýretshi - baspasózge sholý
***
Semeıde saılaý ýchaskelerine kelgenderdiń eń alǵashyqysy №42 mekteptiń oqýshysy, 18 jasqa endi tolǵan Nursultan Nazarbaev boldy, dep jazady "Egemen Qazaqstan" "Nursultan Nazarbaev daýysyn Nursultan Nazarbaevqa berdi" degen taqyryptaǵy maqalasynda. Tańǵy saǵat 7.00-de №164 saılaý ýchaskesinde daýys bergen Nursultan Nazarbaev bul óziniń tuńǵysh ret daýys berýi ekendigin aıtyp, qýanyshymen bólisti. - Otbasymyzda barlyǵymyz saılaýǵa belsene qatysamyz dep keshe naqty sheshim qabyldadyq, - dedi Nursultan Nazarbaev, - anam Kúlánda Tókenbaeva ekeýmiz mine, osy sebepti saǵat tańǵy jetiden alǵashqy bolyp saılaý ýchaskemizge kelip daýys berdik. Munda barlyq jaǵdaı jasalǵan, áýezdi án, úlkendi syılap, kishige izet kórsetý sııaqty ádeptilikti barlyǵy saqtaýǵa tyrysyp jatyr. Árkim óz tańdaýyn jasaýda. Men, árıne, ózimniń aty-jónim Nursultan Nazarbaev bolǵandyqtan, bul saılaýdyń halyq bolashaǵy úshin mańyzdy ekendigin tolyǵymen uqtym. Mekteptegi ustazdarym da, ásirese, dene tárbıesi pániniń muǵalimi Batyr Myrzabekovti erekshe atap ótýime bolady, saılaýdyń mán-maǵynasyn biz sııaqty jastarǵa keńinen túsindirdi. Sondyqtan da mine, ózderińiz baıqasańyz, saılaýǵa qatysýshy 18-19 jastaǵy jastardyń da qatary qalyń. Men óz daýysymdy Elbasy Nursultan Nazarbaevqa berdim.
***
«Nurly jol» baǵdarlamasy aıasynda aldaǵy 4 jylda elimizde 11 avtojol jobasy júzege asyrylyp, 7 myń shaqyrym jol qaıta jańartylady, dep jazady "Aıqyn" gazeti búgingi sanyndaǵy "Jeti myń shaqyrym jol jańǵyrtylady" degen maqalasynda.
Investıtsııalar jáne damý mınıstrligi Avtokólik joldary komıteti tóraǵasynyń orynbasary Amangeldi Bekovtyń málimdeýinshe, maqsatqa jetý úshin Qazaqstannyń ınfraqurylymyn damytý boıynsha 2015-2019 jyldarǵa arnalǵan baǵdarlama ázirlendi. Osy baǵdarlama aıasynda «Batys Eýropa - Batys Qytaı» jobasy aıaqtalyp, ortalyq - ońtústik, ortalyq - shyǵys, ortalyq - batys, Almaty - Óskemen, Qyzylorda - Jezqazǵan - Qaraǵandy, Astana - Petropavl, Oral - Kamenka, Astana qalasynyń ońtústik aınalma joly, Jetibaı - Jańaózen jáne Úsharal-Dostyq jobalary qolǵa alynady.
«Jobalardy der kezinde júzege asyrý úshin Ulttyq qordan 2015-2016 jyldarǵa 301 mlrd teńge bólindi. Qazir halyqaralyq qarjy uıymdarynan shamamen 1 trln teńge nemese 5,5 mlrd dollar kóleminde zaem tartý jumystary josparlanyp jatyr. Mınıstrlik aldyn ala kelissózder júrgizdi, jyl sońyna deıin 12 kelisimge qol qoımaqshymyz. Osylaısha, belgilengen ýaqytqa deıin 7 myń shaqyrym joldy qaıta jańartamyz. Al ortalyq - ońtústik jobasy boıynsha qaryzǵa alynǵan qarajatqa Qaraǵandydan bastap Kýrchatovqa deıin jol salynady. Buǵan 2,6 mlrd dollar kóleminde Dúnıejúzilik bank pen Eýropalyq banktiń qaryzy jumsalady» dedi komıtet tóraǵasy.
"Aıqyn" gazeti búgingi sanynda jazýynsha, Almatydaǵy saýda ortalyqtarynyń birinde kádimgi asyqtan jasalǵan arǵymaqtyń músini bar. Arǵymaqtyń avtory Nurlan Ábishev esimdi qazaq jigiti eken. Nurlannyń ákesi Bolat qurylys salasynyń bilikti mamany bolsa, anasy Ápen apaı 36 jyl boıy Kegendegi ortalyq mektepte qazaq tili men ádebıeti páninen dáris bergen ulaǵatty ustaz eken. Otbasynda tórt bala - bir qyz jáne úsh ul tárbıelenipti. Olardyń biri mýzykant, endi biri muǵalim bolsa, Nurlannan bólek sýretshilikke bet burǵan adam joq eken. Ol kishkentaıynan qurbylary tárizdi dop qýmaı, kerisinshe, daladan ne kórse sony - ushqan qus pen sıyrdyń, jaılaýdaǵy jylqy tárizdi jan-janýarlardyń músinin kádýilgi ermeksazdan jasap áýrege túsedi eken. Bir sát músinnen qoly bosaı qalsa, sýret salýmen álek bolypty.
"Ýchılışeni bitirgen jyly Almatydaǵy teatr jáne óner ınstıtýtynyń (qazirgi Júrgenov akademııasy) dızaıner-ınterer bólimine oqýǵa tústim. Instıtýtty bitirgen soń arnaıy joldamamen týǵan aýylym Kegendegi mektepte jas býynǵa sýret páninen sabaq berdim. Alaıda aıadaı aýylǵa syımadym ba bilmeımin, áıteýir, óner ordasy atanǵan Almatyǵa keldim, - dep Nurlan sol bir kezeńdi eske aldy. Sodan ol «Qazaqfılm» kınostýdııasyna sýretshi bolyp jumysqa ornalasyp, aldymen, «Kóshpendiler» fılmi bas sýretshisiniń kómekshisi boldy. Odan soń jas kınorejısser Rústem Ábdirashevtiń «Qaladan kelgen qyz» fılminiń bas sýretshi bolyp taǵaıyndaldy. Bul Rústemniń zamandasy Nurlannyń boıyndaǵy sýretshilik qasıetti tanyp, oǵan zor senim artqany edi. Odan soń Nurlan Ábishev rejısser Muhıt Narymbetovtyń - «Qarashańyraq», «Aǵaıyndylar», Smaǵul Elýbaıdyń «Kek» fılminiń sýretshisi boldy. Ádette, aýyl aqsaqaldary balalary joryqqa attanarda, qala salyp, úı turǵyzǵanda nemese meshit qurylysyn bastar bolsa: «Qudaı jolyńdy ońǵarsyn! Asyǵyń alshysynan tússin!» dep asyqty alshysynan túsirip, urpaǵyna bata berip, sáttilik tileıtini tulpardyń músinin jasaýda aıryqsha eskerilgen. Sondyqtan mundaǵy asyqtyń barlyǵy alshysynan qoıylǵan. Taǵy bir ereksheligi, tulpardyń oń qanaty óńkeı ońqaı asyqtan, al sol qanaty óńkeı solaqaı asyqtan «túzilgen». Shyndyǵynda, sýretshi hám músinshi Nurlan úshin asyqtan tulpar «turǵyzý» áste ońaıǵa soqqan joq. Tulpardyń qańqasy dánekerleý (svarka) arqyly jasaldy. Segiz myńnan astam asyqtan «túzilgen» arǵymaqtyń beınesi bir qaraǵanda, erkindikti ańsaǵan táýelsiz jas memleket - Qazaqstannyń asqaraly bıikterge batyl adymdap bara jatqanyn kóz aldyńyzǵa ákeledi. Nurlannyń nazar aýdararlyq taǵy bir týyndysy - táýelsiz Qazaq eliniń sımvolyna aınalǵan Qar barysynyń músini. Músinniń ózine tán ereksheligi, ol óte qymbat baǵaly asyl tas - hrýstaldan jasalǵan. Nurlannyń aıtýynsha, Qar barysy músinin daıyndaýǵa qajetti hrýstaldiń barlyǵy sonaý Mysyrdaǵy (Egıpet) hrýstal óndirýmen álemge jaqsy tanylǵan ASFOUR kompanııasynan satyp alynypty. Ásilinde, Qar barysynyń saq-skıfter týraly ańyzda kóshpendilerdiń aıryqsha sımvoly jáne ádiletti jaqtaýshy retinde sıpattalady. Maqala "Asyqtan tulpar "túıgen" sýretshi" degen taqyryppen berilgen.
***
Qazaqstandyq shoý-bıznes ókilderi «Kazahstanskaıa pravda» gazetiniń betterinde Batyrhan Shúkenovti eske alyp, ol týraly estelikterimen bólisti. «Pýt bez ostanovok» atty maqalada QR halyq ártisi Roza Rymbaeva: «Úlken sahnaǵa shyǵyp, árkim óz jolymen ketkenge deıin biz onymen "Araı" ansamblinde birge jumys istedik. Ol jerge ony meniń kúıeýim Tasqyn Oqapov ákelgen edi», - deıdi.
«Men onymen óte jaqyn aralaspadym. Ortaq kontsertter, basqosýlar boldy... Barlyǵy sııaqty men onyń óte jarqyn, adal ári keremet zııaly adam bolǵanyn aıta alamyn. Basqalarly qaıdam, áıteýir ózim sońǵy on shaqty jyl boıy onyń boıynan bir kóńilsizdik sezinip, onyń kópshilikten oqshaýlanyńqyrap júretinin baıqaýshy edim. Bálkim men qatelesip te turǵan shyǵarmyn. Degenmen kezdesken kezderimizde ony bir nárse mazalap, júregin birdeńe alańdatatyn sııaqty seziletin...», - deıdi taǵy bir halyq ártisi Naǵıma Esqalıeva.