Astyqtyń tonnasy qanshadan satylyp jatyr

NUR-SULTAN. QazAqparat – Azyq-túlik korporatsııasynyń resýrstaryna 769,4 myń tonna kóleminde astyq jetkizýge kelisimshart jasaldy. Bul týraly búgin Úkimet otyrysynda QR Aýyl sharýashylyǵy mınıstri Erbol Qarashókeev aıtty, dep habarlaıdy QazAqparat tilshisi.

«Memleket basshysynyń tapsyrmasy aıasynda bıyl Azyq-túlik korporatsııasy aýyl sharýashylyǵy ónimderin forvardtyq satyp alýdy júzege asyrdy. Sonyń arqasynda Azyq-túlik korporatsııasynyń resýrstaryna 769,4 myń tonna kóleminde astyq jetkizýge kelisimshart jasaldy. Aýyl sharýashylyǵy taýaryn óndirýshilermen tolyqtaı esep aıyrysý úshin Azyq-túlik korporatsııasy bıdaı satyp alý baǵasyn 3-synypty bıdaı úshin sapasyna qaraı 103-107 myń teńge aralyǵynda, 4-synypty bıdaı úshin 98 myń teńge, 2-synypty arpa úshin 87 myń teńge mólsherinde belgiledi.

Onyń atap ótýinshe, Azyq-túlik korporatsııasynyń satyp alý baǵalary ishki naryqtaǵy aǵymdaǵy baǵalarǵa sáıkes keledi. Bul fermerlerdiń shyǵyndaryn salanyń odan ári damýyn qamtamasyz etetin rentabeldilik deńgeıimen óteýge múmkindik beredi.

«Ádettegideı, Azyq-túlik korporatsııasynyń satyp alý baǵasy kelisimsharttar jasasý kezinde baǵdar bolyp sanalady. Osylaısha ádil baǵa belgileý astyq baǵasynyń kúrt aýytqýyn boldyrmaýǵa múmkindik bermek», - dedi Erbol Qarashókeev.