Astyq tasymaldaıtyn vagondar porttarda qańtarylyp turýǵa májbúr

ASTANA. QazAqparat - Qazaqstanda aǵymdaǵy jyldyń 10 aıynda  6,7 mln tonna astyq tasymaldandy.  Bul týraly búgin Úkimet úıinde ótken baspasóz máslıhatynda «QTJ - Júk tasymaly» AQ-nyń prezıdenti Oralhan Qulaqov aıtty, dep habarlaıdy QazAqparat.

«Aǵymdaǵy jyldyń 10 aıynyń ishinde ótken jyldyń deńgeıindegi  6,7 mln tonna astyq tasymaldandy. Qazaqstannyń geografııalyq ornalasýy men kólik ınfraqurylymy aıyna  jańa túsimniń 1,5 mln tonnasyn tasymaldaý kólemin qamtamasyz etýge múmkindik beredi. Bul  1 mln tonna astyq pen 300 myń tonna undy quraıdy», - dedi ol.

Onyń aıtýynsha, túsimniń jaqsy sapalyq jáne sandyq kórsetkishteri astyq pen un eksporty qurylymynyń ózgerýine yqpal etti. Italııa, Túrkııa, Iran, Aýǵanstan tárizdi alys elderge eksport artty. Bul óz kezeginde alysqa tasymaldaýdyń artýyna jáne astyq tasymaly tutynýshylyq parki men jabyq vagondardyń kóbeıýine sebepshi boldy.

«Porttar baǵytynda astyq tasymaldaý kúrt artty. Kaspıı men Qara teńiz prottary baǵytynda ósim bar. Buǵan qosa, porttardaǵy  bos termınaldardyń bolmaýynan jáne kemelerdiń kelmeýi saldarynan astyq tasymaldaıtyn vagondardan astyqty túsirý merzimi uzara tústi. Máselen, 1 qarashadaǵy jaǵdaıǵa sáıkes Aqtaý portynda - 1,5 myńnan astam, Novorossıısk portynda 500-den astam astyq tasymaldaıtyn vagon turyp qaldy», - dedi Qulaqov.