Astronomdar kometa fonyndaǵy kishkentaı Jerdi túsirip aldy

NUR-SULTAN. QazAqparat – AQSh, Konnetıkýttegi Iel ýnıversıtetiniń astronomdar komandasy Gavaı araldarynda Kek atyndaǵy observatorııada 2I/Borısov kometasyn sýretke túsirip aldy, dep habarlaıdy QazAqparat tilshisi «Vse o kosmose» saıtyna silteme jasap.

Sýrette kometanyń quıryǵynyń uzyndyǵy 160 000 shaqyrym ekeni kórinip tur. Bul Jerdiń dıametrinen 14 ese úlken jáne bizdiń ǵalamsharymyzdan Aıǵa deıingi qashyqtyǵy 40 protsentten asady, delingen habarlamada.

«Biz Jer men kometany bir sýretke ornalastyrsa, Jerdiń qanshalyq kip-kishkentaı bolatyndyǵyn kórip, tańǵaldyq», - dedi Iel ýnıversıtetiniń astronomııa professory Pıter van Dokkým óz málimdemesinde.

Atalǵan kometany tamyz aıynyń sońynda áýesqoı astronom Gennadıı Borısov ashty. Nysannyń jyldamdyq taldamasy men traektorııasy onyń Kún júıesiniń syrtynan keletinin kórsetip otyr, ıaǵnı bul 2017 jyldyń qazan aıynda alǵash ret baıqalǵan jumbaq asteroıd Oýmýamýadan keıingi juldyzaralyq keńistiktegi ekinshi «qonaq».

Borısov kometasynyń bolashaǵy orasan. Ol qazirge deıin Kún júıesinde júr, al onyń orbıtasynyń perıgelııi (Kúnge eń jaqyn núktesi) 8 jeltoqsanda bolady dep kútilýde. Sodan keıin úsh apta ótken soń kometa Jerge jaqyndamaq.