Astrahan oblysynda Roza Baǵlanovanyń 100 jyldyǵy atap ótildi

ASTRAHAN. QazAqparat – Reseı Federatsııasynyń Astrahan oblysynda qazaqtyń kórnekti ánshisi, KSRO halyq ártisi, Qazaqstannyń Halyq qaharmany Roza Baǵlanovanyń 100 jyldyǵyna arnalǵan shyǵarmashylyq kesh ótti. QazAqparat bul týraly Qazaqstannyń Reseıdegi Elshiligine silteme jasap habarlaıdy.

Merekelik shara Volodar aýdanyndaǵy Qurmanǵazy atyndaǵy oblystyq mádenıet ortalyǵynda ótti.

Kesh qonaqtary – QR jáne RF Parlamentteriniń joǵarǵy palatalary arasyndaǵy yntymaqtastyq jónindegi komıssııa otyrysynyń qatysýshylary, jergilikti memlekettik organdar men qazaq dıasporasynyń ókilderi, Astrahan oblysynyń turǵyndary.

Kontsert barysynda Qurmanǵazy atyndaǵy aımaqtyq mádenıet ortalyǵynyń shyǵarmashylyq ujymy Roza Baǵlanovanyń repertýarynan tanymal shyǵarmalardy oryndady.

Sonymen qatar qonaqtar kórnekti ánshiniń ómiri men shyǵarmashylyq qyzmetine qatysty qyzyqty derektermen tanysyp, qazaqtyń ulttyq taǵamdarynan dám tatty, ulttyq oıyndar men halyq qolóner buıymdaryn tamashalady, baıqaýlarǵa qatysyp, Qurmanǵazy murajaıynyń ekspozıtsııasymen tanysty.