Astyq ónimi Qazaqstandy nan, un jáne makaron ónimderimen tolyq qamtamasyz etýge jetkilikti
«Naryqtyq ekonomıka jaǵdaıynda ónimniń baǵasyn taýardyń barlyq túrleri sııaqty kásipkerler óndirý, saqtaý jáne tasymaldaý kezindegi shyǵyndardy eskere otyryp, sondaı-aq suranys pen usynystyń tepe-teńdigi negizinde derbes belgileıdi. Baǵanyń ósýine kóptegen faktorlar áser etedi. Onyń ishinde ónimniń ózindik qunyna tikeleı áser etetin shıkizat, materıaldar, energııa, qyzmetter baǵasynyń ósýi, tasymaldaý shyǵyndary jáne basqalary bar», - delingen mınıstrliktiń agenttiktiń resmı saýalyna bergen jaýabynda.
Vedomstvonyń atap ótýinshe, «Saýda qyzmetin retteý týraly» Zańnyń 7-babynyń 15-7-tarmaǵyna sáıkes baǵa monıtorıngin Saýda jáne ıntegratsııa mınıstrligi júzege asyrady. Al Aýyl sharýashylyǵy mınıstrlgi «áleýmettik» nannyń baǵasyn turaqtandyrý úshin «Azyq-túlik korporatsııasy» arqyly óńirlerge arzandatylǵan bıdaı jetkizý jumystary baqylaýǵa alǵan.
«Bıyl bul maqsattarǵa óńirlerge 120 myń tonna astyqty jetkizýge 5,4 mlrd teńge bólindi. Osy jyldyń naýryz-qyrkúıek aılary aralyǵynda Azyq-túlik korporatsııasymen un tartatyn kásiporyndarǵa 24,5 myń tonna arzandatylǵan bıdaı jetkizildi. Búgingi tańda qalǵan kólemder boıynsha memorandýmǵa qaıta qol qoıyldy, atalǵan jumystar jalǵasýda. Jalpy alǵanda bıylǵy jyly jınalatyn astyqtyń kóleminiń byltyrǵy jylmen salystyrǵanda kemigendigine qaramastan, kútiletin astyq ónimi Qazaqstandy nan, un jáne makaron ónimderimen tolyq qamtamasyz etýge, sondaı-aq dástúrli eksporttyq naryqtarǵa jóneltýge jetkilikti bolady», - dep sendiredi mınıstrlikten.