Astyq eksporttaıtyn sharýalarǵa sýbsıdııa beriledi

<p>ASTANA. KAZINFORM &mdash; Qazaqstan astyqtyń básekege qabiletti baǵasyn qamtamasyz etý maqsatynda astyq eksporttaıtyn sharýalardyń kólik shyǵyndaryn óteýge sýbsıdııa bóledi. Bul týraly Úkimet qaýly jobasy &laquo;Ashyq NQA&raquo; <a href="https://legalacts.egov.kz/npa/view?id=15320993&amp;utm_source=in_materials" target="_blank" rel="noopener">portalynda </a>jarııalandy.&nbsp;</p>

Sharýalardyń jol shyǵyndaryn óteýge sýbsıdııa bólýdiń taǵy bir sebebi — astyq tolǵan elevatorlardy bosatý ýaqytynyń tyǵyzdyǵy.

— 1,5 mln tonna astyqty eksporttaýǵa kólik shyǵyndary qunyn óteýge astyqtyń tonnasyn 20 000 myń teńge mólsherinde arzandatýǵa sýbsıdııa qajet. Jobany iske asyrý úshin respýblıkalyq bıýdjetten astyqty eksportqa tasymaldaý jónindegi shyǵyndy óteýge 30 000 000 000 (otyz mıllıard) teńge mólsherinde qarajat bólý qajet, — delingen qujatta.

Sondaı-aq atalǵan qujatty qabyldaý agroónerkásiptik sektordaǵy áleýmettik-ekonomıkalyq damýdyń ilgerileýine, aýyl sharýashylyǵy taýaryn óndirýshilerdiń eksporttyq áleýetin keńeıtýge jáne logıstıkalyq salasyna oń yqpal etetindigi aıtylǵan.

Sonymen qatar qujat jobasynda astyq eksporttaıtyn elder men sharýalarǵa beriletin sýbsıdııanyń kólemi kórsetilgen:

— Reseı Federatsııasynyń aýmaǵy arqyly Qara jáne Baltyq teńizderiniń Reseı porttarynyń baǵytyna bir tonna úshin 20 000 teńge;

— Reseı Federatsııasynyń, Latvııa Respýblıkasynyń, Lıtva Respýblıkasynyń, Estonııa Respýblıkasynyń aýmaǵy arqyly Baltyq teńizi porttarynyń baǵytyna bir tonna úshin 20 000 teńge;

— Qytaı Halyq Respýblıkasy arqyly Ońtústik-Shyǵys Azııa elderiniń baǵytyna bir tonna úshin 20 000 teńge;

— Túrikmenstan arqyly Aýǵanstan Islam Ámirliginiń baǵytyna bir tonna úshin 20 000 teńge;

— Ázerbaıjan Respýblıkasynyń, Grýzııanyń, Armenııa Respýblıkasynyń baǵytyna bir tonna úshin 20 000 teńge;

— Iran Islam Respýblıkasynyń baǵytyna bir tonna úshin 20 000 teńge.

Qujat jobasy 2024 jylǵy 7 jeltoqsanǵa deıin qoǵamdyq talqylaýǵa usynylyp otyr.

Buǵan deıin Kazinform tilshisi Qazaqstan qaı memleketterge, qansha kólemde astyq jetkizetini jáne kásipkerler tap bolǵan qıyndyqtar men kedergilerge taldaý jasaǵan edi. 

Aıta ketsek, otandyq fermerlerden 1 mln tonna astyqty tikeleı satyp alý josparlanyp otyr. 

Eske salsaq, jaqynda Prezıdent Úkimetke Azyq-túlik korporatsııasy arqyly sharýalardan astyq satyp alýdy tapsyrdy.