Astara-Resht temirjoly Eýrazııa óńirinde jańa múmkindikterge jol ashady - Ilham Alıev

ASTANA. QazAqparat - Astara-Resht temirjoly qysqa ýaqyttyń ishinde salynady jáne ol bútin Eýrazııa óńirinde jańa múmkindikterge jol ashady.Sársenbi kúni Ázerbaıjan basshysy Ilham Alıev Iran Prezıdenti Hasan Rýhanımen birlesip jasaǵan málimdemesinde osylaı aıtty, dep habarlaıdy Trend.az agenttigi.

«Búgin birqatar qujattarǵa qol qoıyldy, onyń ishinde eki qujatty erekshe atap ótkim keledi. Bul bizdiń Kaspıı teńizindegi birlesken jumystarymyz ben Astara-Resht temirjoly qurylysyna baılanysty qujattar. Olardyń tarıhı mańyzy zor.  Sebebi, osy qujattardy júzege asyrý arqyly Kaspıı teńizindegi, sondaı-aq kólik salasyndaǵy yntymaqtastyǵymyz jańa deńgeıge kóterilip, óńirlik seriktestikke oń áserin beredi», - dedi Prezıdent Ilham Alıev.

Ilham Alıev «Soltústik-Ońtústik» kólik dáliziniń qalǵan bóligi - Astara- Resht temirjolynyń qurylysy qysqa ýaqytta aıaqtalyp, bútin Eýrazııa óńiri úshin jańa múmkindikterge jol ashylatynyna senim bildirdi.

«Soltústik-Ońtústik» kólik dálizi bizdiń jáne kórshi elderdiń birlesken kúsh-jigeriniń arqasynda júzege asyrylyp jatyr. Sonymen qatar, biz «Ońtústik-Batys» kólik dálizin qurýdy bastadyq jáne bolashaqta «Soltústik-Ońtústik» jáne «Shyǵys-Batys» kólik dálizderi qosylady», - dedi Ázerbaıjan basshysy.

foto:iran.ru