Astananyń joldary nege toza beredi?

ASTANA. QazAqparat - Qazirgi kezde elordada jol jóndeý jumystary birneshe baǵytta júrgizilip jatyr. Atap aıtqanda, problemalyq ýchaskelerde júktemeni azaıtý, shaǵyn aınalma jol salý, jańa joldar salyp, eskilerin qalpyna keltirý, turǵyn alabtarynda jol ınfraqurylymyn damytý, sondaı-aq kóshelerdi ortasha jóndeý, dep jazady astana.gov.kz.

Joldar nege tozady? Onyń negizgi úsh sebebi bar: joldarmen júk kólikteriniń júrýi, jer asty sýlarynyń jaqyn ornalasýy jáne budyrly shınalar. Sońǵysy kóp jyldan beri qyzý talqyǵa túsip júr. Keıbir memleketterde budyrly shınalardy paıdalanýǵa tyıym salynsa, basqalary jaı ǵana shekteý qoıyp, jol jabynynyń búlinýin azaıtý maqsatynda jeńil budyrlardy qoldanýǵa ruqsat etken.

Budyrly shınalar elordalyq joldardyń tozýyna áser etetin sebepterdiń ishinde úshinshi orynda. Kóp jaǵdaıda jol jabynyn aýyr júk tasymaldaıtyn kólikter búldiredi.

Astana jas qala, Bas josparǵa sáıkes onyń shekarasy áli tolyq qalyptasqan joq. Búgingi tańda elordada 1300 nysan salynyp jatyr. Táýlik boıy aýyr júk tasymaldaıtyn kólikter (beton aralastyrǵysh mashına, kóterme krandar, kamazdar) kelip-ketip jatady. Olar jylyna 2 mıllıonǵa jýyq reıs jasaıdy eken.

Kólik quraly neǵurlym aýyr bolsa, jol jabyny soǵurlym tez tozady. Onyń ústine Astana mańynan aǵyndy jer asty sýlary ótedi. Elordada jol qurylysy barysynda jergilikti jerdiń barlyq geologııalyq erekshelikteri eskerilse de, paıdalaný kezinde jer asty sýlarynyń jol jabynynyń sapasyna áseri saqtalady.