Astananyń jekemenshik balabaqshalaryna qosymsha 8 myń orynǵa memlekettik tapsyrys beriledi

ASTANA. QazAqparat - Bıyl Astanada jekemenshik balabaqshalarǵa 8 myń orynǵa memlekettik tapsyrys ornalastyrylady. Bul týraly qalalyq Bilim basqarmasynyń alqa otyrysynda aıtyldy, dep habarlaıdy QazAqparat elorda ákimdiginiń saıtyna silteme jasap.

Bilim basqarmasynyń basshysy Qasymhan Senǵazyev atap ótkendeı, bıyl balabaqshadaǵy oryn sanyn arttyrý maqsatynda mektepke deıingi jekemenshik uıymdarda 8 myń balaǵa memlekettik tapsyrys ornalastyrylady. Sonymen qatar turǵyn úı keshenderiniń birinshi qabattarynda qadamdyq qoljetimdilik qaǵıdaty boıynsha 200 orynǵa arnalǵan balabaqshalar jelisi ashylady.

«Byltyr balabaqsha tárbıeshileriniń 120 pedagogi qaıta daıarlaý kýrsynan jáne 641 pedagog biliktilikti arttyrý kýrsynan ótti. 2023 jyly mektepke deıingi bilim berý pedagogterine arnalǵan biliktilikti arttyrý kýrstarynan jalpy 1 012 tárbıeshi ótedi. 2025 jylǵa deıin beıindi bilimi bar tárbıeshilerdiń úlesin kezeń-kezeńimen 100% jetkizetin bolamyz», - dedi Qasymhan Senǵazyev.

Sondaı-aq Basqarma basshysynyń aıtýynsha, bıyl mektepterde kórkem ádebıet qoryn ulǵaıtý maqsatynda bıýdjetten 100 mln teńge bólinedi. Kitaphanalardyń ıntererin qaıta jańǵyrtý boıynsha jumys jalǵasýda. Búgingi tańda qalanyń 36 mektebinde kitaphanalar zamanaýı jabydyqtaldy. 46 mektepte oqyrmandarǵa arnalǵan kovorkıng (soworking) aımaqtary ashyldy. 2023 jyldyń ekinshi toqsanynyń sońyna deıin 19 mektep kitaphanalarynyń ıntereri (redızaın) jańartylyp, jańa kovorkıng ortalyqtary ashylady.

Budan bólek, málim bolǵandaı, bıyl Astanada 2 myńnan astam oqýshyǵa arnalǵan oqýshylar saraıy iske qosylady.