Astananyń jańa temir jol vokzalynda poıyzdar birden alty qabatty ǵımarat ishine kiretin bolady (FOTO)
Halyqaralyq EKSPO kórmesine arnalǵan vokzal aýmaǵy qazirgi qoldanystaǵy eskisinen 11 ese úlken. Uzyndyǵy 630 metr, bıiktigi 49,5 metr, eni 116 metr. - Qurylysshylar táýlik boıy jumys jasaýda. Qazirgi kezde irgetasy aıaqtalyp, vokzaldyń qabyrǵasy kóterile bastady. 13000 tonna metall qurastyrmasy (58 paıyzy) ıgerildi. Vokzaldyń negizgi qaýsyrmasyn qaraǵandylyq «Imstalkon» AQ daıyndaýda, - deıdi «QTJ» UK» AQ fılıaly iri jobalardy júzege asyrý jónindegi dırektsııanyń dırektory Vladımır Klıng. Onyń aıtýynsha, qazirgi kezde nysanda 1300 maman jumysqa tartylǵan. Joba boıynsha, poıyzdar ǵımarattyń ishine enedi. Ol úshin jabyq úlgidegi alty estakada salynýda. Estakadanyń uzyndyǵy 2550 metr bolsa, oǵan tirekterdiń 87-si turǵyzyldy. Búginge deıin aralyq qurylystaǵy 17300 tonna (69 paıyz) metall qaýsyrmalary qurastyryldy. Jolaýshylarǵa barynsha qolaıly bolýy úshin sońǵy úlgidegi ǵımarat qýat únemdeý lıftilerimen, eskalatorlarymen jabdyqtalady. Munda jer asty jylý almastyrǵyshtary vokzaldy termaldyq kózder arqyly qyzdyrady. Mundaı tehnologııa ǵımaratty qysta jylytsa, jazda salqyndatady. Joba boıynsha poıyzdar alty qabatty vokzal ishine kire alady. Avtokólik quraldary da ondaǵy jolaýshylar da vokzalǵa kire beristegi 9,75 metrlik qabatta temir jol platformasyna aıaldaıdy. Qoldanystaǵy qazirgi vokzal táýligine 7 myń adamǵa qyzmet kórsetedi. Al jańa vokzal arqyly táýligine 35 myń jolaýshy óte alady. Elordanyń basty temir jol qaqpasy oǵan qosylatyn Tobyl, Kókshetaý, Qaraǵandy, Pavlodar baǵdarlaryna jolaýshylardy bir mezgilde saparǵa attandyrady. Jańa Astana vokzaly kesheni «Myńjyldyq» alleıasyna ornalasqan. Ony 2017 jylǵy naýryzda paıdalanýǵa berý josparlanyp otyr.