Astananyń jańa bas jospary: Qalada taǵy úsh kópir salynady

ASTANA. QazAqparat – Elordanyń 2035 jylǵa deıingi bas jospary jobasy aıasynda qalada taǵy 3 kópir salynbaq. Bul týraly «Astana bas jospary» mekemesiniń dırektory Rýslan Jaqypov málim etti, dep habarlaıdy QazAqparat tilshisi.

Búgin qalalyq máslıhattyq qoǵamdyq keńes músheleri otyrysynda Astananyń 2035 jylǵa deıingi damý bas jospary qaraldy.

Talqylaý barysynda kóterilgen máseleniń biri - qaladaǵy jol qozǵalysy, ıaǵnı kólik keptilisi máselesin sheshý.

«Qalanyń bas josparynda 3 kópirdiń jobasy bar. Búginde olardyń jobalyq qujattary ázirlenip jatyr», - dep qysqa jaýap qaıyrdy «Astana bas jospary» mekemesiniń dırektory Rýslan Jaqypov.

Onyń aıtýynsha, jańadan salynatyn kópirler qaladaǵy jol qozǵalysyn retteýge septigin tıgizedi.

Eske salsaq, elordada Táýelsizdik dańǵyly boıynda salynyp jatqan kópirdi jyl sońyna deıin paıdalanýǵa berý josparlanyp otyrǵanyn habarlaǵan edik.

Astana qalasy ákimdigi apparatynyń jetekshisi mindetin atqarýshy Nurlan Álimjanovtyń aıtýynsha, kópirdiń iske qosylýy jol qozǵalysyn edáýir jeńildetýge múmkindik beredi.