Astananyń toıynda at shappasa syn bolar - Bekbolat Tileýhan «Astana kýbogy» báıgesi jaıly aıtyp berdi

ASTANA. QazAqparat - Elordada sanaýly kúnderden keıin bastalatyn «Uly Dala rýhy» festıvali aıasynda ótetin «Astana kýbogy» báıgesi úlken (25 shaqyrym) jáne kishi (16 shaqyrym) alaman atty eki saıystan ótedi. Bul týraly OKQ-da ótken baspasóz máslıhatynda Ulttyq Sport túrleri qaýymdastyǵy prezıdenti Bekbolat Tileýhan málim etti, dep habarlaıdy QazAqparat tilshisi.

Aıta ketsek, Astana qalasynyń 20 jyldyǵyna arnalǵan ulttyq sporttyń segiz túrinen úsh aıǵa sozylatyn doda 16 qyrkúıekke deıin jalǵasady.

«Mádenıet jáne sport mınıstrligi tarapynan «Uly Dala rýhy» festıvaline arnaıy bıýdjetten aqsha bólindi. Jasyratyny joq, ulttyq sport ońtústik óńirlerde ǵana óte joǵary dárejede damyǵan. Sondyqtan, jarysty mınıstrlik jáne qaýymdastyq tarapynan oılasa kelip, ár óńirlerde ótkizý kerek dep sheshtik. «Uly Dala rýhy» festıvaliniń irikteý kezeńderi soltústik aımaqtar úshin Astanada, shyǵys óńirlerindegi sportshylar úshin Pavlodarda ótkiziledi. Sol sekildi batys jaqta, Mańǵystaýda kókpar komandasy qalaı jaqsy damyp kele jatyr. Atyraý oblysynda ákimshiliktiń qoldaýymen ulttyq sportty damytý úshin pármender bolyp jatyr», - deıdi Bekbolat Tileýhan.

Májilis depýtaty sonymen birge, 6 shildede ótetin «Astana kýbogy» báıgesi týraly tolyǵyraq málimet berdi.

«Astananyń 20 jyldyǵy ár qazaq balasynyń rýhynyń, eldiginiń merekesi ekenin biletin bolsaq, mundaı merekede at shappasa úlken syn bolady. Kez kelgen toıda at shaptyryp, báıge jasaıdy. Báıge -  qazaq úshin saltanattyń eń bıik shoǵyry. Týra osy sózimdi Astana qalasynyń ákimi Áset Isekeshevke aıttym. 6 shilde kúni jaqsylap turyp, bir báıge jasaımyz dep otyrmyz. Júlde qory - 20 mıllıon teńge bolady. Báıge - úlken jáne kishi alamannan ótedi (25 shaqyrym jáne 16 shaqyrym). Osy ýaqytqa deıin 14 oblystan jáne 2 qaladan qatysady dep kelgenbiz. Al qazir jospar jaqsy jaǵyna ózgerip, 14 oblystan jáne 3 aımaqtan keletin boldy, ıaǵnı Shymkent qalasy men Túrkistan oblysy qosyldy. Ár jerden eki atqa ǵana lımıt beriledi. Sodan keıin sport basqarmalary eń myqty attaryn jarysqa qosady», - deıdi ol.

Bekbolat Tileýhannyń aıtýynsha, úlken alamannan top jarǵany úshin birinshi orynǵa - 20 myń AQSh dollary beriledi.

«Qysqa qashyqtyqtaǵy báıgelerdi ótkizip jatqandar bar. Ol Eýropa elderinde de uıymdastyrylady. Al biz qazaqy báıgege kóbirek den qoıyp otyrmyz. Eń azy bizde - 16 shaqyrym. Ony biz kishi alaman dep otyrmyz. Úlken alaman - 25 shaqyrym. 20 myń dollarlyq júldeni 25 shaqyrymda kim top jarady - sol alady. Al úlken alamanda ekinshi orynǵa 10 myń, úshinshi orynǵa 5 myń dollar, tórtinshi orynǵa 650 myń teńge, besinshi orynǵa 500 myń teńge tabystalady. Al endi kishi alamannyń bas báıgesi - 10 myń dollar bolady», - dedi Bekbolat Tileýhan.