Astananyń sol jaǵalaýyndaǵy eki kósheni sý basty

  ASTANA. QazAqparat - Astananyń sol jaǵalaýynyń ortalyǵynda, Syǵanaq jáne Túrkistan kósheleriniń qıylysynda sý qubyry jarylyp, sol mańaıdy sý alyp ketti, dep habarlaıdy QazAqparat.

Sýyq sý qubyry jelilerinde bolǵan apat saldarynan Túrkistan men Syǵanaq kósheleriniń qıylysy jabyldy. Sondaı-aq, «Máńgilik el» kópiriniń astyndaǵy ýchaskeni de sý basty.

iKomek qyzmeti habarlaǵandaı, apat týraly shaǵym tańǵy saǵat 5-te kelip túsken. Sý qubyry «Beıjiń Palas» qonaqúıiniń tusynda jarylǵan. Qazir «Astana sý arnasy» sý qubyrynyń tesilgen jerin qalpyna keltirýmen aınalysýda. Sýyq sý ázirge óshirilgen joq.

Osy qıylysta ornalasqan keńselerdiń qyzmetkerleri, sol mańdaǵy úılerde turatyn turǵyndar kósheniń bir jaǵynan aǵyp jatqan jaıylma sýdy keship ótip júr.